जगात सर्वाधिक अंडी कुठे खाल्ली जातात, भारताचा नंबर कितवा? वाचून वाटेल आश्चर्य!
येत्या 1 एप्रिल रोजीपासून उत्तर प्रदेशात अंड्यांवर एक्स्पायरी डेट लिहिलेली असेल. या निर्णयाची देशभरात चर्चा होत आहे. दरम्यान, भारतात दरवर्षी एक व्यक्ती किती अंडी खाते, याची तुम्हाला कल्पना नसेल. त्याबाबत जाणून घ्या.
उत्तर प्रदेशमध्ये येत्या 1 एप्रिल रोजीपासून एका आगळ्यावेगळ्या नियमाची अंमलबजावणी केली जाईल. या नियमानुसार आता प्रत्येक अंड्यावर एक्स्पायरी डेट लिहिलेली असेल. म्हणजेच खूप दिवसांपासून विक्रीसाठी अंडे ठेवल्याचे ग्राहकांना लगेच समजणार आहे.
दरम्यान, या निर्णयामुळे भारत अंडी उत्पादनात कितव्या स्थानी आहे, तसेच भारतात अंडी खाणाऱ्यांचे प्रमाण किती आहे, ते जाणून घेऊ या. एक व्यक्ती वर्षभरात किती अंडी खाते याबाबत बोलायचे झाल्यास जगात मेक्सिको हा देश सर्वात पुढे आहे.
मेक्सिकोमध्ये प्रत्येक व्यक्ती वर्षाला सरासरी 363 अंडी खाते. म्हणजेच मेक्सिकोमध्ये प्रत्येक व्यक्ती रोज एक तरी अंडे खातेच. अंडे हे प्रोटीनचा प्रमुख स्त्रोत असल्याचे तिथे मानले जाते. त्यामुळे तिथे आहारात अंडी मोठ्या प्रमाणात असतात.
भारत अंडी उत्पादनाच्या बाबतीत मात्र मेक्सिकोच्या पुढे आहे. अंडी उत्पादनाच्या क्षेत्रात भारत दुसऱ्या क्रमांकाचा देश आहे. पहिल्या क्रमांकावर चीन आहे. 2024-25 साली भारतात 149.11 अब्ज अंड्यांचे उत्पादन झाले.
भारतात प्रत्येक व्यक्ती वर्षाला सरासरी 106 अंडी खाते. मेक्सिकोच्या तुलनेत हा आकडा खूपच कमी आहे. अंडी उत्पादनाच्या क्षेत्रात भारत बांगलादेश, पाकिस्तान, श्रीलंकेच्याही पुढे आहे. आता ग्रामी भागातही अंडी खाणाऱ्यांचे प्रमाण वाढत आहे. लोकांमध्ये जागरुकता निर्माण होत आहे.
