स्वयंपाकघरात तेल सांडलंय? साफ करण्याचे टेन्शन आलंय? फक्त हा एक पदार्थ टाका आणि जादू पाहा
स्वयंपाकघरात सांडलेले तेल स्वच्छ करणे आता सोपे झाले आहे. काही घरगुती उपायांच्या मदतीने तुम्ही फरशीवरचा चिकटपणा आणि तेलाचे डाग सहज स्वच्छ करु शकता.
स्वयंपाकघरात काम करताना अनेकदा घाईघाईत आपल्याकडून चुका होतात. कधी मीठ सांडतं, तर कधी चुकून तेल सांडतं. तेल सांडणे ही गृहिणींसाठी मोठी डोकेदुखी ठरते.
स्वयंपाक घरातील तेलाचे डाग स्वच्छ करणं कठीण जाते. तसेच तेलामुळे फरशीवर चिकटपणा तसाच राहतो. विशेष म्हणजे यामुळे पाय घसरून पडण्याची भीतीही असते.
जर तुमच्याकडूनही स्वयंपाकघरात तेल सांडलं असेल, तर आता टेन्शन घेण्याचे काहीही कारण नाही. काही सोप्या घरगुती उपायांच्या मदतीने तुम्ही काही मिनिटात तेलकट डाग पूर्णपणे स्वच्छ करू शकता.
स्वयंपाकघरात तेल सांडल्यास त्यावर लगेच थोडे गव्हाचे पीठ टाका. साधारण ५ मिनिटे पीठ तसेच राहू द्या, जेणेकरून ते तेल शोषून घेईल. त्यानंतर एका कागदाने किंवा कापडाने ते पीठ पुसून टाका.
यामुळे फरशीवरचा चिकटपणा पूर्णपणे निघून जाईल. तसेच डागही राहणार नाहीत. गव्हाच्या पिठाप्रमाणेच मीठ देखील तेल स्वच्छ करण्यासाठी अत्यंत प्रभावी आहे. तेल सांडलेल्या भागावर मीठ पसरवून ठेवा आणि ५ ते ६ मिनिटांनी टिश्यू पेपरने पुसून घ्या. मीठ तेल शोषून घेते, ज्यामुळे पृष्ठभाग एकदम स्वच्छ होतो.
जर फरशीवर जुने किंवा कठीण तेलाचे डाग असतील. तर लिंबाचा एक तुकडा घेऊन त्यावर थोडे मीठ टाका. या लिंबाने डाग असलेल्या जागेवर हलक्या हाताने घासल्यास कठीण डागही सहज निघून जातात. या टिप्स वापरून तुम्ही तासनतास मेहनत न करता आपलं स्वयंपाकघर स्वच्छ आणि सुरक्षित ठेवू शकता.
