Amla Shampoo At Home: घरीच बनवा आवळ्याचा शॅम्पू! जाणून घ्या साहित्य आणि कृती!
आवळा, रिठा आणि शिकेकाई यांसारख्या नैसर्गिक घटकांपासून तयार केलेला हर्बल शॅम्पू केस आणि टाळू स्वच्छ ठेवण्यास मदत करतो

आवश्यक साहित्य :सुकी शिकेकाई – १० तुकडे, सुका आवळा – ८ ते १० तुकडे, रिठा – ५ ते ६ तुकडे, मेथीदाणे आणि जवस – प्रत्येकी १ चमचा, कढीपत्ता आणि कडुनिंबाची पाने – प्रत्येकी १० ते १२, जास्वंदाची फुले आणि पाने – प्रत्येकी ६ ते ७, कोरफड – अर्धा कप, पाणी – १ लिटर,
आवळा, रिठा, शिकेकाई, मेथीदाणे आणि जवस एका लिटर पाण्यात रात्रभर भिजत ठेवा. त्यामुळे हे सर्व घटक मऊ होतील. सकाळी या मिश्रणात कढीपत्ता, कडुनिंबाची पाने, जास्वंदाची फुले व पाने आणि अर्धा कप कोरफड घाला. हे मिश्रण मध्यम आचेवर साधारण १५ मिनिटे उकळा.
पाणी निम्मे झाल्यानंतर गॅस बंद करा. मिश्रण पूर्णपणे थंड झाल्यावर स्वच्छ सुती कापडाने किंवा बारीक गाळणीने गाळून घ्या. तयार शॅम्पू स्वच्छ बाटलीत भरून ठेवा.
शॅम्पू वापरण्यापूर्वी बाटली हलवा. केस आणि टाळू पाण्याने ओले करून हा शॅम्पू मुळांपासून लावा. बोटांच्या टोकांनी ३ ते ५ मिनिटे हलक्या हाताने मसाज करा. नंतर पाण्याने स्वच्छ धुवा.
हा शॅम्पू वापरताना केसांच्या आणि टाळूच्या प्रकृतीनुसार वापराचे प्रमाण ठरवा. नैसर्गिक घटकांमुळेही काहींना ॲलर्जी किंवा जळजळ होऊ शकते, त्यामुळे आधी थोड्या भागावर चाचणी करा. हा घरगुती शॅम्पू असल्याने त्यात प्रिझर्व्हेटिव्ह नसतात; त्यामुळे फ्रिजमध्ये ठेवा, थोड्या प्रमाणात तयार करा आणि वास, रंग किंवा पोत बदलल्यास वापरू नका.