IMD Weather Forecast : महाराष्ट्राला पाऊस झोडपणार, राज्यावर तिहेरी संकट, आयएमडीकडून धोक्याचा इशारा
गेल्या आठवड्यात राज्यात थंडीचा कडाका वाढला होता, मात्र आता वातावरणात अचानक बदल झाला असून महाराष्ट्रात पावसाचा इशारा देण्यात आला आहे.
राज्यासह देशभरात अचानक थंडीला ब्रेक लागला आहे, महाराष्ट्रासह अनेक राज्यांमध्ये जोरदार पावसाची शक्यता आहे, असा अंदाज हवामान विभागाकडून (IMD) वर्तवण्यात आला आहे. या पावसाचा मोठा फटका हा शेतकऱ्यांना बसण्याची शक्यता आहे.
हवामान विभागानं दिलेल्या माहितीनुसार पुढील दोन ते तीन दिवस राजधानी दिल्लीसह देशातील अनेक भागांमध्ये मेघ गर्जनेसह आणि विजांच्या कडकडाटासह पावसाची शक्यता आहे. तर काही भागांमध्ये गारपिटीचा देखील धोका आहे.
गेल्या आठवड्यात देशात कडाक्याची थंडी होती, मात्र उत्तरेकडून येणारं वार आणि समुद्रातील बाष्पयुक्त हवेमुळे वातावरणात अचानक बदल झाला असून, ढगाळ वातावरण तयार झालं आहे.
महाराष्ट्राबाबत बोलायचं झाल्यास राज्यातील अनेक भागांमध्ये पुढील 24 तासांमध्ये गारपिटीसह पावसाचा इशारा देण्यात आला आहे.सोबतच वादळी वाऱ्याचा देखील इशारा हवामान विभागाकडून देण्यात आला आहे. दरम्यान पाऊस, गारपीट आणि वादळ असं तिहेरी संकट पुढील दोन दिवस राज्यावर असणार आहे.
उत्तर महाराष्ट्र आणि विदर्भाला पाऊस झोडपण्याची शक्यता आहे. हवामान विभागाकडून उत्तर महाराष्ट्रात धुळे, जळगाव, नाशिक, आणि अहिल्यानगर या जिल्ह्यांमध्ये गारपिटीसह पावसाचा इशारा दिला आहे.
तर विदर्भात अकोला जिल्ह्यासह इतर काही भागांमध्ये गारांसह पाऊस पडू शकतो असा अंदाज हवामान विभागाकडून वर्तवण्यात आला आहे.
दरम्यान बंगालच्या उपसागरात पुन्हा एकदा कमी दाबाचा पट्टा निर्माण झाला आहे. त्यामुळे पुढील दोन दिवस राज्यात गारपिटीसह पावसाचा अंदाज वर्तवण्यात आला आहे. त्यानंतर पुन्हा एकदा 30 तारखेनंतर गारठा वाढण्याची शक्यता आहे.
