शेतकऱ्यांसाठी काय पण..! आज फॉर्च्यूनर उद्या बीएमडब्ल्यू मधूनही द्राक्ष विक्री झाली पाहिजे, कोल्हापूरच्या बहाद्दराने वेधले लक्ष
कोल्हापूर : शेतकरी केवळ नावाला राजा आहे. मात्र, आजही उत्पादन आणि शेतीमाला मिळणारे दर यामुळे जीवनमानात काही फरक पडलेला नाही. आजही सर्वकाही बाजारपेठेवरही आणि मध्यस्ती असलेल्या दलालावरच अवलंबून आहे. ग्राहक आणि शेतकरी यांच्यात मोठी दरी निर्माण झाली असून त्याचा फायदा हे मध्यस्ती घेत आहेत. मात्र, दरी मोडीत काढण्यासाठी कोल्हापूरात एका शेतकऱ्यांने राबवलेला अनोखा फंडा अनेकांचे लक्ष वेधून घेत आहे. या पट्ट्याने चक्क फॉर्च्यूनर गाडीमध्येच द्राक्षांचा स्टॉल उभारला आहे. तावडे परिसरात अलिशान फॉर्च्यूनर गाडी...शेतकरी राहुल सावंत यांच्या गळ्यात सोन्याचा कंठा आणि बाहूवर 7/12 चा उल्लेख आणि द्राक्ष विक्रीचा उभारलेला स्टॉल हा सर्वाचे लक्ष वेधून घेत होता. शिवाय शेतकऱ्यानेच असेच असायला पाहिजे. शेतकरी एवढा समृध्द पाहिजे की फॉर्च्यूनरच काय तर त्याने बीएमडब्ल्यू मधून आपल्या शेतीमालाची विक्री करायला पाहिजे असा विश्वास त्यांनी व्यक्त केला आहे.
सावंत यांनी वेधले कोल्हापूरकरांचे लक्ष: शेतकरी असलेले राहुल सावंत यांनी शहरातील तावडे हॉटेल परिसरात हा द्राक्ष विक्रीचा स्टॉल उभारला आहे. त्यामुळे थेट ग्राहकांना तर लाभ होत आहे. पण फॉर्च्यूनर मधून द्राक्ष विक्री हा कोल्हापूरकरांसाठी आकर्षणाचा विषय बनला आहे. द्राक्ष खरेदीसाठी अनेकांची गर्दी होत आहे.
हे सर्व कशासाठी? शेती कष्ट करुन शेतीमाल उत्पादीत करतो मात्र, योग्य दर मिळत नसल्यामुळेच त्याच्या पदरी निराशा पडत आहे. त्यामुळे आपला शेती दलालांच्या हाती न देता स्वत: विकला तर त्याचा अधिकचा फायदा आहे. त्यामुळेच शेतकरी राहुल सावंत यांनी फॉर्च्यूनर गाडीमध्येच द्राक्षांचा स्टॉल लावला असून थेट ग्राहकांना विक्री केली जात आहे.
शेतकरी ते ग्राहक ही संकल्पना: शेतकरी ते ग्राहक यांच्यामध्ये मोठी दरी निर्माण झाली आहे. त्याचा फायदा हे मध्यस्ती असलेले दलाल घेत आहेत. त्यामुळे शेतकऱ्यांचे आणि पर्यायाने ग्राहकांचेही नुकसान होत आहे. त्यामुळे शेतकरी ते ग्राहक थेट संवाद होण्याच्या दृष्टीने हे पाऊल सावंत यांनी उचलले आहे.
शेतीमालाची थेट ग्राहकांना विक्री व्हावी म्हणून शेतकऱ्याने चक्क फॉर्च्यूनर गाडीमध्येच स्टॉल उभारला आहे.
शेतकरी समृध्द तर सर्वकाही: शेतकरी समृध्द झाला तर सर्वकाही साध्य होणार आहे. त्यामुळे आज फॉर्च्यूनर मधून जरी द्राक्षे विकली जात असली तरी उद्या हाच शेतकरी बीएमडब्ल्यू मधूनही द्राक्ष विकू शकतो. एवढा बळीराजा प्रगत व्हावा ही त्यांची भावना आहे.
