सात समुद्रापार ढोल पथक, सलग 2 तास धमाकेदार परफॉर्मन्स
Ganesh Visarjan 2023 | महाराष्ट्रात गणेश विसर्जन मिरवणूक सुरु असताना त्याचा उत्साह देश-विदेशातील नागरिकही पाहत आहेत. स्वीडनमधील महाराष्ट्रीयन मंडळींनी एकत्र येत नवीन पायंडा पडला. मराठी संस्कृती स्वीडनमधील रस्त्यांवर दिसली.
पुणे, मुंबईत गणेश विसर्जनाचा उत्साह सुरु असताना सात समुद्रापार महाराष्ट्रीय संस्कृती जपण्याचा यशस्वी प्रयत्न मराठीजणांनी केला. मुंबई, पुणेमधील ढोल-ताशा पथकाप्रमाणे धमाकेदार परफॉर्मन्स स्वीडनमध्ये दिसला. स्वीडनमधील नागरिकांनी त्याला चांगलीच दाद दिली.
स्वीडनमध्ये पहिल्यांदा ढोल-ताशा पथकाची सुरुवात करण्यात आली. त्यासाठी स्वीडनमधील मराठीजणांनी ‘स्वराज्य ढोल-ताशा पथक’ स्थापन केली. या पथकाने स्वीडनमधील गणेश मंदिरात पहिला परफॉर्मन्स सादर केला. त्याला उत्कृष्ट प्रतिसाद मिळाला.
स्वीडनमधील स्टॉकहोममध्ये अभिनय सरकटे यांनी ढोल-ताशा पथकाची स्थापना केली. तसेच गोथेनबर्गमध्ये प्रणाली मानकर यांनी त्यासाठी प्रयत्न केले. या दोघांनी एकत्र येऊन दमदार सादरीकरण स्वीडनमधील रस्त्यांवर केले.
गणेश विसर्जनाच्या उत्सवानिमित्त या पथकाने सलग 2 तास परफॉर्मन्स केला. यावेळी बाप्पा मोरयाचा जयघोष सुरु होता. ढोल-ताशाच्या तालावर स्वीडमध्ये असलेल्या मराठीजणांनी ठेका धरला. सातासमुद्रापार महाराष्ट्रीयन सांस्कृतिक समृद्धीचा प्रसार या मंडळींकडून होत आहे.
स्वीडिश ध्वजाच्या निळ्या आणि पिवळ्या रंगांची छटा असलेली वेशभूषा या पथकाने परिधान केली होती. त्यावेळी स्वीडिश भूमीवर भारतीय परंपरेचा सुंदर अनुभव सादर करण्यात आला. या प्रयत्नास स्वीडनमधील नागरिकांनी प्रतिसाद दिला.
