मुंबईत उच्चभ्रू सोसायटीच्या लिफ्टमध्ये चक्क विषारी साप, पुढे जे घडलं ते पाहून तुमच्याही अंगावर येतील शहारे
मुंबईतील धारावी परिसरातील एका उच्चभ्रू सोसायटीच्या लिफ्टमध्ये सोमवारी सकाळी विषारी साप आढळल्याने मोठी खळबळ उडाली. रहिवाशांमध्ये भीतीचे वातावरण होते. सर्पमित्र सचिन मोरे यांनी तातडीने घटनास्थळी धाव घेतली.
मुंबईतील धारावी परिसरातील एका उच्चभ्रू सोसायटीत सोमवारी सकाळी साप आढळल्याने मोठी खळबळ उडाली. या सोसायटीच्या लिफ्टमध्ये चक्क एक विषारी साप आढळल्याने रहिवाशांमध्ये भीतीचे वातावरण पसरले होते. लिफ्टमधील पंख्याच्या वरच्या जागेत हा साप दडून बसल्याचे समोर आले.
सोमवारी सकाळी १० वाजण्याच्या सुमारास धारावीतील ओएनजीसी (ONGC) समोरील एका इमारतीत लिफ्टमध्ये साप आढळल्याची माहिती माहीम येथील सर्पमित्र सचिन मोरे यांना मिळाली.
लिफ्टमधील पंख्याच्या वरच्या बाजूला सुमारे तीन फूट लांबीचा हा साप बसलेला होता. हा साप विषारी असल्याने सोसायटीच्या आवारात असलेल्या रहिवाशांमध्ये मोठी घबराट पसरली होती.
या घटनेची माहिती मिळताच सर्पमित्र सचिन मोरे यांनी तातडीने सोसायटी गाठली. त्यांनी तांत्रिक उपकरणांचा वापर करून, अत्यंत कौशल्यपूर्ण पद्धतीने लिफ्टमधील पंख्याच्या वरच्या जागेतून या विषारी सापाला सुरक्षितपणे बाहेर काढले.
हा साप बराच काळ सोसायटीच्या आवारात होता, ज्यामुळे रहिवासी चिंतेत होते. यानंतर सापाला प्लास्टिकच्या डब्यात बंद केल्यानंतरच लोकांनी सुटकेचा श्वास घेतला. या संपूर्ण बचावकार्याच्या वेळी सर्पमित्र सचिन मोरे यांच्यासोबत वन विभागाचे अधिकारीही उपस्थित होते.
सापाला सुरक्षितपणे पकडल्यानंतर, वन विभागाच्या नियमांनुसार आणि मार्गदर्शक तत्त्वांनुसार त्याला नैसर्गिक अधिवासात म्हणजेच जंगलात नेऊन सोडण्यात आले. सर्पमित्राच्या तत्परतेमुळे आणि वन विभागाच्या सहकार्यामुळे एक मोठी दुर्घटना टळली.
