Navratri 2026 : मुस्लीम कुटुंब आवडीने सजवते देवीचा मंडप, दुर्गापूजेची 600 वर्षे जुनी परंपरा वाचून अभिमान वाटेल!
या उत्सवात मुस्लिम समाजातील नागरिकही सक्रिय सहभाग घेतात. दुर्गामातेचा मंडप सजवणे आणि प्रसाद तयार करण्यास हातभार लावणे, अशा विविध कामांत स्थानिक लोक एकत्र येतात.
पश्चिम बंगालमधील मुर्शिदाबाद जिल्ह्यातील रघुनाथगंज परिसरातील बहुरा गावात दुर्गापूजेची एक वैशिष्ट्यपूर्ण परंपरा आजही जपली जाते. येथील कोडाखाकी दुर्गापूजा सुमारे 600 वर्षांपासून सुरू असल्याचे सांगितले जाते. धार्मिक सलोखा आणि सांस्कृतिक एकतेचे दर्शन घडवणारी ही परंपरा आहे.
या दुर्गापूजेचे सर्वात मोठे वैशिष्ट्य म्हणजे देवीला पहिला नैवेद्य एका मुस्लिम कुटुंबाकडून अर्पण केला जातो. ही प्रथा आजही पाळली जाते. अनेक पिढ्यांपासून सुरू असलेली ही परंपरा स्थानिकांच्या श्रद्धेचा एक महत्त्वाचा भाग बनली आहे.
या उत्सवात मुस्लिम समाजातील नागरिकही सक्रिय सहभाग घेतात. दुर्गामातेचा मंडप सजवणे आणि प्रसाद तयार करण्यास हातभार लावणे, अशा विविध कामांत स्थानिक लोक एकत्र येतात. त्यामुळे हा उत्सव केवळ धार्मिक कार्यक्रम न राहता सामूहिक सहभागाचे एक चांगले उदाहरण आहे.
बहुरा गावातील या पूजेचे वैशिष्ट्य म्हणजे हा भाग मुस्लिमबहुल आहे. तरीही येथे दुर्गापूजेची परंपरा उत्साहाने जपली जाते. धर्म वेगवेगळे असले, तरी स्थानिक नागरिक एकत्र येऊन उत्सव साजरा करतात. परस्पर सहकार्यामुळे गावातील सांस्कृतिक वारसा एका पिढीकडून दुसऱ्या पिढीकडे पोहोचत आहे.
सामाजिक एकता आणि धार्मिक सलोखा हा भारताचा आत्मा आहे. मुर्शिदाबादमधील ही परंपरा एकतेचं आदर्श उदाहरण असल्याचे बोलले जाते. देवीच्या पूजेत मुस्लिम कुटुंबाचे योगदान आणि स्थानिकांचा सामूहिक सहभाग यातून परस्पर आदराची भावना दिसून येते.
