भोंदूबाबा अशोक खरातचा नवीन प्रताप समोर, थेट परदेशात..; फोटो पाहून तुम्हीही व्हाल थक्क!
नाशिकमधील स्वयंघोषित आध्यात्मिक गुरु अशोक खरात याच्या लक्झरी लाइफस्टाइलचा पर्दाफाश झाला आहे. दक्षिण कोरियासह अनेक विदेशी दौरे आणि १०० कोटींच्या साम्राज्याची आता एसआयटी (SIT) कडून कसून चौकशी केली जात आहे.
नाशिकमधील आध्यात्मिक गुरु आणि स्वयंघोषित अंकशास्त्रज्ञ अशोक खरात उर्फ कॅप्टन यांचे अनेक काळे कारनामे एकापाठोपाठ एक समोर येत आहेत. महिलांच्या लैंगिक शोषणाच्या आरोपाखाली अटकेत असलेल्या खरातच्या वैयक्तिक आयुष्याबद्दल आता आणखी एक नवीन माहिती समोर आली आहे.
अशोक खरातच्या तपासादरम्यान अशोक खरातच्या पूर्ण कुटुंबाचे फोटो समोर आले आहेत. खरातला दोन मुली आणि एक मुलगा असे कुटुंब असून, त्याने आपल्या कुटुंबासह अनेक विदेशी दौरे केल्याचे उघड झाले आहे.
विशेषतः त्याच्या दक्षिण कोरियाच्या सहलीचे काही फोटो व्हायरल झाले आहेत. ज्यामध्ये तो टी-शर्ट घालून मजामस्ती करताना दिसत आहे. एका बाजूला आध्यात्मिकतेचा आव आणणारा खरात दुसऱ्या बाजूला विलासी जीवन जगत होता, हे या फोटोंवरून स्पष्ट होत आहे.
अशोक खरातने केवळ दक्षिण कोरियाच नव्हे, तर इतरही अनेक देशांचे दौरे केले आहेत. एका सामान्य ज्योतिष प्रॅक्टिसपासून सुरू झालेला त्याचा प्रवास १०० कोटींच्या साम्राज्यापर्यंत कसा पोहोचला, याचा तपास आता विशेष तपास पथक (SIT) करत आहे.
या विदेशी दौऱ्यांसाठी पैसा कुठून आला? या दौऱ्यांमध्ये त्याच्यासोबत कोणकोणते बडे प्रस्थ होते? हे दौरे केवळ पर्यटनासाठी होते की यात काही आर्थिक गैरव्यवहार दडलेले आहेत? यांसह अनेक प्रश्नांची सध्या चौकशी सुरु आहे.
त्यासोबतच पोलीस आता खरातच्या पासपोर्ट आणि ट्रॅव्हल हिस्ट्रीची कसून चौकशी करणार आहेत. अशोक खरातला एका ३५ वर्षीय महिलेने दिलेल्या तक्रारीवरून अटक करण्यात आली आहे.
स्वतःला कृष्णाचा अवतार सांगून आणि महिलांना गुंगीचे औषध देऊन त्यांचे शोषण केल्याचा त्याच्यावर आरोप आहे. पोलिसांना त्याच्या कार्यालयातून आणि फार्म हाऊसवरून १०० हून अधिक आक्षेपार्ह व्हिडिओ सापडले आहेत.
तपासादरम्यान एक पिस्तूल आणि जिवंत काडतुसे देखील जप्त करण्यात आली आहेत. अनेक राजकीय नेते, सेलिब्रिटी आणि बड्या उद्योजकांसोबतचे त्याचे संबंध आता वादाच्या भोवऱ्यात सापडले आहेत. या प्रकरणामुळे नाशिकसह संपूर्ण महाराष्ट्रात खळबळ उडाली आहे. या भोंदू बाबाचे आणखी किती बळी आहेत, याचा शोध पोलीस घेत आहेत.
