अशोक सराफ यांच्या वाढदिवशी निवेदिता यांची खास पोस्ट, ‘..यावर अजूनही विश्वास बसत नाही’
दिग्गज अभिनेते आणि पती अशोक सराफ यांच्या वाढदिवसानिमित्त निवेदिता सराफ यांनी सोशल मीडियावर अत्यंत खास पोस्ट लिहिली आहे. या पोस्टमध्ये निवेदिता यांनी त्यांच्या भावना व्यक्त केल्या आहेत. अशोक सराफ यांचा आज 79 वा वाढदिवस आहे.
मराठी सिनेसृष्टीतील दिग्गज अभिनेते अशोक सराफ यांचा आज 79 वा वाढदिवस आहे. यानिमित्त त्यांची पत्नी आणि अभिनेत्री निवेदिता सराफ यांनी इन्स्टाग्रामवर खास फोटो शेअर करत त्यांना शुभेच्छा दिल्या आहेत. पारंपरिक पोशाखात अशोक सराफ आणि निवेदिता सराफ यांनी हे सुंदर फोटोशूट केलं आहे.
निवेदिता यांनी त्यांच्या पोस्टमध्ये लिहिलं, 'अशोक, आज तू 79 व्या वर्षात पदार्पण करतोयस यावर अजूनही विश्वास बसत नाही. वय हा केवळ आकडा आहे आणि हे तू सिद्ध केलंस. तुझी तुझ्या कामाप्रती असलेली निष्ठा, शिस्त आणि स्वत:वरील नियंत्रण यासाठी शतश: प्रणाम.'
'तू एक आदर्श मुलगा, प्रेमळ पिता, उत्तम पती आणि जिवलग मित्र आहेस. वाढदिवसाच्या शुभेच्छा डार्लिंग,' अशा शब्दांत निवेदिता यांनी प्रेम व्यक्त केलं आहे. अशोक सराफ आणि निवेदिता सराफ यांनी 1989 मध्ये लग्न केलं. या दोघांच्या वयात 18 वर्षांचं अंतर आहे.
'डार्लिंग डार्लिंग' या नाटकादरम्यान या दोघांची पहिली भेट झाली होती. या नाटकाचा प्रयोग जेव्हा शिवाजी मंदिरात झाला होता, तेव्हा निवेदिता तिथे आल्या होत्या. अशोक सराफ यांचा 'दोन्ही घरचा पाहुणा' हा चित्रपट प्रदर्शित झाला तेव्हा निवेदिता फक्त सहा वर्षांच्या होत्या.
मराठी कलाविश्वातील ही अत्यंत लोकप्रिय जोडी काही दिवसांपूर्वीच 'कान चित्रपट महोत्सवा'च्या रेड कार्पेटवर एकत्र झळकली होती. यावेळी अशोक सराफ आणि निवेदिता सराफ यांच्या मराठमोळ्या अंदाजाने सर्वांचं लक्ष वेधलं होतं.
