रजनीकांत ते मणी रत्नम.. ऐश्वर्याच्या दुसऱ्या लग्नाला साऊथ सुपरस्टार्सची मांदियाळी
दाक्षिणात्य चित्रपटसृष्टीतील प्रसिद्ध दिग्दर्शक शंकर यांची मुलगी ऐश्वर्याचा शाही विवाहसोहळा चेन्नईमध्ये पार पडला. या लग्नाला अनेक साऊथ सुपरस्टार्सनी हजेरी लावली होती. रजनीकांत, कमल हासन, मणिरत्नम, विक्रम, नयनतारा यांसह इतरही कलाकार लग्नाला उपस्थित होते.
चित्रपटांमधील भव्यदिव्य सेट्स आणि लार्जर दॅन लाइफ सीन्ससाठी दाक्षिणात्य दिग्दर्शक शंकर ओळखले जातात. आता त्यांनी त्यांच्या मुलीच्या लग्नासाठीही अशीच भव्यदिव्य तयारी केली आहे. चेन्नईमध्ये 15 एप्रिल रोजी ऐश्वर्या शंकरचा लग्नसोहळा धूमधडाक्यात पार पडला.
या ग्रँड लग्नसोहळ्याचे फोटो सध्या सोशल मीडियावर व्हायरल होत आहेत. या फोटोंमध्ये लग्नसोहळ्याची भव्यदिव्यता सहज पहायला मिळतेय. इतकंच नव्हे तर ऐश्वर्याच्या लग्नाला साऊथ सुपरस्टार्सची खास मांदियाळी होती.
तमिळनाडूचे मुख्यमंत्री एम. के. स्टॅलिन यांच्यासोबत रजनिकांतसुद्धा या लग्नाला उपस्थित होते. रजनीकांत यांनी शंकर यांच्यासोबत तीन चित्रपटांमध्ये काम केलं. शिवाजी, एथीरान आणि 2.0 या चित्रपटांसाठी दोघांनी एकत्र काम केलं होतं.
अभिनेते कमल हासनसुद्धा ऐश्वर्याच्या लग्नाला उपस्थित होते. ते दिग्दर्शक शंकर यांच्यासोबत 'इंडियन 2' या चित्रपटामध्ये काम करत आहेत. याशिवाय दाक्षिणात्य चित्रपटसृष्टीतील इतरही काही नामवंत कलाकार या शाही लग्नसोहळ्याला हजर होते.
दिग्दर्शक मणिरत्नम, अभिनेत्री सुहासिनी, विक्रम, सूर्या, कार्ती आणि अर्जुन यांचीही उपस्थिती पहायला मिळाली. अभिनेत्री नयनतारासुद्धा पती विग्नेश शिवनसोबत या लग्नात हजर होती. त्यांनी सोशल मीडियावरही लग्नसोहळ्याचे फोटो शेअर केले आहेत.
दिग्दर्शक शंकर सध्या दोन मोठ्या दाक्षिणात्य चित्रपटासाठी काम करत आहेत. रामचरणच्या 'गेम चेंजर' या तेलुगू चित्रपटाचं दिग्दर्शन ते करत आहेत. तर कमल हासन यांच्या 'इंडियन 2' या चित्रपटाच्या दिग्दर्शनाची जबाबदारीसुद्धा त्यांच्यावरच आहे.
