Uddhav Thackeray : दुष्काळी दौरे काजू बदाम खाण्यासाठी आहेत का? ठाकरेंचा सरकारला चिमटा

शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांनी महाराष्ट्रातील दुष्काळी परिस्थिती आणि शेतकऱ्यांच्या समस्यांवरून राज्य सरकारवर जोरदार टीका केली आहे. मागील वर्षी घोषित झालेले ३१,००० कोटी रुपयांचे पॅकेज किती शेतकऱ्यांपर्यंत पोहोचले, असा सवाल त्यांनी केला. यंदाच्या दुष्काळ निवारणासाठी सरकारने कोणती पावले उचलली, याची माहिती महाराष्ट्राला द्यावी, अशी मागणीही त्यांनी केली. ठाकरे यांनी “दुष्काळी दौरे नुसते काजू-बदाम खाण्यासाठी आहेत का?” असा थेट प्रश्न विचारत सरकारच्या दौऱ्यांच्या हेतूवर शंका व्यक्त केली. त्यांनी म्हटले की, खरीप हंगाम शेतकऱ्यांच्या हातातून गेला असून त्यांच्यावर कर्जाचा डोंगर वाढत आहे.

पंचनाम्यांना होणारा विलंब आणि मदतीसाठीच्या घोषणांमधील दिरंगाई यावरही त्यांनी नाराजी व्यक्त केली. कर्जमाफी आणि एक रुपयातील पीक विमा योजनेची प्रत्यक्ष अंमलबजावणी आणि लाभार्थी शेतकऱ्यांची संख्या यावरही ठाकरेंनी स्पष्टता मागितली. शेतकरी अन्नदाता असतानाही त्याला वारंवार संकटांचा सामना करावा लागतोय, असे मत त्यांनी मांडले.