राष्ट्रीय पुरस्कार विजेतीसारखा अभिनय..; रिंकू राजगुरूच्या वारीच्या गाण्यावर कमेंट्सचा वर्षाव
'सैराट' फेम अभिनेत्री रिंकू राजगुरूचा पहिला अल्बम साँग नुकताच प्रदर्शित झाला आहे. वारीच्या निमित्ताने विठुरायाचं हे खास गाणं नेटकऱ्यांना खूपच आवडलं आहे. या अल्बममध्ये रिंकूचा कधीही न पाहिलेला अंदाज समोर आला आहे.
नागराज मंजुळे दिग्दर्शित 'सैराट' या चित्रपटातून घराघरात पोहोचलेली अभिनेत्री रिंकू राजगुरूचा पहिलावहिला अल्बम साँग नुकताच प्रेक्षकांच्या भेटीला आला आहे. 'बाप विठुराया' असं या गाण्याचं नाव असून वारीच्या पार्श्वभूमीवर ते अधिक खास ठरतंय.
रिंकू राजगुरू तिचे प्रोजेक्ट्स फार विचारपूर्वक निवडताना दिसते. तिच्या कामाची पद्धत इतर कलाकारांपेक्षा थोडी वेगळी असल्याने प्रचंड लोकप्रिय होऊनही तिने आजवर कुठलाच अल्बम साँग केला नव्हता. आता पहिल्यांदाच तिने अल्बम साँग करण्याचा निर्णय घेतला असून त्यामागचं कारणही खास आहे.
अजय गोगावले यांच्या आवाजातील 'बाप विठुराया' हे गाणं नेटकऱ्यांना खूप आवडलं आहे. रिंकूने सोशल मीडियावर गाणं पोस्ट करताच त्यावर लाइक्स आणि कमेंट्सचा वर्षाव होऊ लागला आहे. या गाण्यात रिंकूने एका गरोदर महिलेची भूमिका साकारली आहे.
रिंकूने खरंच या गाण्यात राष्ट्रीय पुरस्कार विजेती अभिनेत्रीसारखा अभिनय केला आहे, अशा प्रतिक्रिया नेटकरी देत आहेत. नागराज मंजुळेंमुळे मराठी चित्रपटसृष्टीला उत्तम अभिनेत्री मिळाली, असंही कौतुक काहीजण करत आहेत.
माझं विठ्ठलाशी नातं खूप खास आहे. त्यांच्यावर माझं प्रचंड प्रेम आणि श्रद्धा आहे. माझ्या प्रत्येक गोष्टीत ते माझ्यासोबत असतात. त्यामुळे माझं पहिलं अल्बम विठ्ठलावर चित्रीत झाल्याचा मला खूप आनंद आहे, अशी प्रतिक्रिया रिंकू राजगुरूने दिली आहे.
