Shweta Tiwari: श्वेता तिवारीसोबत अफेअरच्या चर्चा, घटस्फोटाने घाबरून अभिनेता म्हणाला, मी आमिर खानसारखा नाही..
Shweta Tiwari: अभिनेत्री श्वेता तिवारीसोबत विशालचं अनेकदा नाव जोडलं गेलं. आता नुकत्याच दिलेल्या एका मुलाखतीत त्याने यावर मनमोकळी प्रतिक्रिया दिली आहे. त्याचसोबत लग्नाबद्दल त्याचे काय विचार आहेत, याविषयीही त्याने स्पष्ट शब्दांत सांगितलं आहे.
अभिनेत्री श्वेता तिवारी ही टेलिव्हिजन इंडस्ट्रीतील आघाडीची आणि अत्यंत लोकप्रिय अभिनेत्री आहे. गेल्या अनेक वर्षांपासून तिने विविध मालिकांमध्ये भूमिका साकारून स्वत:चा मोठा चाहतावर्ग निर्माण केला आहे. श्वेता तिच्या कामासोबतच खासगी आयुष्यामुळेही सतत चर्चेत असते. टीव्ही इंडस्ट्रीतील कोणत्या ना कोणत्या अभिनेत्यासोबत तिचं नाव सतत जोडलं जातं.
गेल्या काही वर्षांपासून श्वेता तिवारीचं नाव अभिनेता विशाल आदित्य सिंहशी जोडलं जातंय. आता 'टेली चक्कर'ला दिलेल्या एका मुलाखतीत विशालने डेटिंगच्या चर्चांवर मौन सोडलं आहे. विशालने स्पष्ट केलं की श्वेता आणि तो फक्त चांगले मित्र आहेत. त्यापेक्षा जास्त त्यांच्यात काहीच नाही.
या मुलाखतीत विशालला जेव्हा त्याच्या 'रिलेशनशिप स्टेटस'बद्दल विचारलं गेलं, तेव्हा त्याने 'सिंगल' असल्याचं सांगितलं. लग्नाबद्दल बोलताना तो पुढे म्हणाला, "एखाद्यासोबत राहायचं असेल तर लग्न करण्याची काय गरज आहे? ज्याप्रकारे हल्ली घटस्फोटांचं प्रमाण वाढतंय, ते पाहून मला लग्नच करायचं नाहीये. लग्न करून घटस्फोट द्यायचा नाहीये. जगात जे घडतंय, ते माझ्यासोबतही घडेल."
"मी आमिर खानसारखा नाही. जोपर्यंत लग्न परफेक्ट होत नाही, तोपर्यंत एकानंतर एक लग्न करतच राहण्यासारखा मी नाही. एकच आयुष्य आहे, एकच लग्न करेन. मला लग्नाच अपयश नको आहे. त्यामुळे मी लग्नच करणार नाही. आजूबाजूचे अनुभव पाहता माझी लग्न करण्याची इच्छाच होत नाही", अशा शब्दांत विशाल व्यक्त झाला.
याविषयी त्याने पुढे सांगितलं, "लोक मला सांगतात की तीन वर्षांनंतर प्रेम ओसरतं. त्यानंतर फक्त एकमेकांशी जुळवून घेणंच महत्त्वाचं ठरतं. तेव्हा माझ्या लक्षात आलं की जर मी माझ्या पत्नीवर प्रेम करत नसेन, तर माझं तिच्याशी जुळवून घेणं शक्यच होणार नाही. जर ती माझ्यावर प्रेम करत नसेल, तर तीसुद्धा माझ्याशी जुळवून घेणार नाही. जोपर्यंत तुम्हाला खरोखरच कोणासोबत जवळीक साधण्याची इच्छा होत नाही, तोपर्यंत लग्नाला काही अर्थ नाही. मी कधीही लग्न करणार नाही."
