चहा प्यायल्यानंतर छातीत जळजळ आणि थकवा येतो, ही तर फक्त सुरुवात, पुढे जाऊन…
सकाळी उठल्याबरोबर रिकाम्या पोटी चहा पिणे आरोग्यासाठी का घातक आहे, हे सोप्या भाषेत समजून घ्या. पोटाच्या समस्या, हाडांची कमजोरी आणि थकवा यांसारख्या ५ महत्त्वाच्या कारणांची सविस्तर माहिती इथे दिली आहे.
सकाळी उठल्यावर वाफाळलेला चहा पिणे हे अनेकांसाठी आनंदाचे असते. घरातील कामे असोत किंवा ऑफिसची धावपळ, सकाळचा नाश्ता टाळून फक्त चहा पिऊन कामाला लागणाऱ्यांची संख्या मोठी आहे. मात्र, ही वरवर साधी दिसणारी सवय तुमच्या आरोग्यासाठी सायलेंट किलर ठरू शकते, असा इशारा आरोग्य तज्ज्ञांनी दिला आहे.
आपण रात्री ७-८ तास झोपतो, तेव्हा आपले पोट रिकामे असते. या काळात पोटात नैसर्गिकरित्या काही 'आम्ल' (Acid) तयार झालेले असते. जेव्हा आपण रिकाम्या पोटी चहा पितो, तेव्हा त्यातील कॅफीन आणि टॅनिन या घटकांमुळे हे ॲसिड आणखी वाढते. यामुळेच सकाळी चहा घेतल्यावर अनेकांना छातीत जळजळ होणे किंवा आंबट ढेकर येण्याचा त्रास होतो.
चहामध्ये साखर असल्याने आपल्याला थोडा वेळ ताजेतवाने वाटते, पण ही ऊर्जा फार काळ टिकत नाही. थोड्या वेळाने रक्तातील साखरेची पातळी कमी होते आणि मग दिवसभर थकवा आणि आळस जाणवायला लागतो. शरीराला खरी ऊर्जा हवी असेल, तर चहाऐवजी पौष्टिक नाश्ता करणे गरजेचे आहे.
चहामध्ये 'टॅनिन' नावाचा पदार्थ असतो. हा पदार्थ आपण खाल्लेल्या अन्नातील किंवा दूधातील कॅल्शियम आणि लोह (Iron) शोषून घेण्यास शरीराला विरोध करतो. जर रोज रिकाम्या पोटी चहा प्यायला, तर शरीरात रक्ताची कमतरता (ॲनिमिया) जाणवू शकते आणि हाडांना पुरेसे कॅल्शियम न मिळाल्याने ती लवकर दुखू लागतात.
सकाळी उठल्यावर आपल्या शरीराला पाण्याची खूप गरज असते. पण चहा हे डाययुरेटिक (मूत्रवर्धक) पेय आहे, म्हणजेच चहा प्यायल्याने लघवीला वारंवार जावे लागते. यामुळे शरीरातील पाणी कमी होते. पाणी कमी झाल्यामुळे स्नायू आखडणे, गोळे येणे किंवा डोकेदुखीचा त्रास सुरू होऊ शकतो.
चहातील कॅफीन थेट आपल्या मेंदूवर परिणाम करते. रिकाम्या पोटी जास्त प्रमाणात चहा घेतल्याने मनात अस्वस्थता जाणवणे, विनाकारण भीती वाटणे किंवा तणाव वाढणे असे होऊ शकते. तसेच सकाळी घेतलेल्या चहाचा परिणाम रात्रीच्या झोपेवरही होतो, ज्यामुळे झोप लवकर लागत नाही.
