AUS vs AFG: जादरानचं विक्रमी शतक! अफगाण खेळाडूने पहिल्यांदाच रचला इतिहास
Ibrahim Zadran : वनडे वर्ल्डकप 2023 स्पर्धेत अफगाणिस्तानने जबरदस्त कामगिरी केली आहे. तीन दिग्गज संघांना पराभूत करत अफगाणिस्तान उपांत्य फेरीच्या शर्यतीत आहे. ऑस्ट्रेलिया विरुद्ध अफगाणिस्तानने चमकदार कामगिरी केली.
अफगाणिस्ताने आपल्या खेळीने सर्वांचं लक्ष वेधून घेतलं आहे. ऑस्ट्रेलिया विरुद्ध नाणेफेकीचा कौल जिंकत प्रथम फलंदाजी स्वीकारली. वर्ल्डकप स्पर्धेत ऑस्ट्रेलियाविरुद्ध शतक झळकावणारा जादरान हा अफगाणिस्तानचा पहिला खेळाडू आहे.
21 वर्षीय जादरानने जोश हेझलवूडच्या चेंडूवर दोन धावा घेत आपलं शतक पूर्ण केलं. शतकी खेळीसाठी त्याने 131 चेंडू घेतले.
समिउल्लाह शिनवारी याने 2015 वर्ल्डकपमध्ये स्कॉटलंडविरुद्ध 147 चेंडूत 96 धावा केल्या होत्या. अफगाणिस्तानच्या फलंदाजाची ही सर्वोच्च वैयक्तिक धावसंख्या होती.
या विश्वचषकात चेन्नईत पाकिस्तानविरुद्ध जादरानने 87 धावांची खेळी केली होती. अफगाणिस्तानच्या फलंदाजाची या स्पर्धेतील तिसरी सर्वोच्च धावसंख्या ठरली.
21 वर्षे आणि 330 दिवसांचा जादरन हा विश्वचषकात शतक झळकावणारा चौथा तरूण खेळाडू ठरला आहे. आयर्लंडचा पॉल स्टर्लिंग, ऑस्ट्रेलियाचा रिकी पाँटिंग आणि श्रीलंकेचा अविष्का फर्नांडो यांच्यानंतर त्याचा नंबर लागला आहे.
वनडे वर्ल्डकप स्पर्धेत अफगाणिस्तानला उपांत्य फेरी गाठणं शक्य होऊ शकते. त्यामुळे गुण आणि रनरेटच्या आकडेवारीत अफगाणिस्तानचं गणित बसलं तर उपांत्य फेरी गाठली तर आश्चर्य वाटायला नको.
