BAN vs NZ : वनडेनंतर बांगलादेशचा टी20 सामन्यातही न्यूझीलंडला दे धक्का! पहिल्यांदाच क्रिकेट इतिहासात असं घडलं
बांगलादेश संघ सध्या न्यूझीलंड दौऱ्यावर आहे. विदेशात बांगलादेशची कामगिरी सुमार राहिली आहे. विजयासाठी धडपड अनेक वर्षे क्रीडाप्रेमींनी पाहिली आहे. आता बांगलादेश इतिहासाची पानं बदलताना दिसत आहे. न्यूझीलंडच्या धरतीवर टी20 मध्ये पहिला विजय मिळवला आहे.
बांगलादेशने काही दिवसांपूर्वी न्यूझीलंडमध्ये पहिला एकदिवसीय सामना जिंकला होता. आता अशाच विक्रमाची नोंद टी20 स्पर्धेतही केली आहे. न्यूझीलंडला घरच्या मैदानावर टी20 आंतरराष्ट्रीय सामन्यात पराभूत केले आहे.
बांगलादेशने नेपियर येथे खेळल्या गेलेल्या पहिल्या टी20 सामन्यात न्यूझीलंडचा 5 गडी राखून पराभव केला. 135 धावांच्या लक्ष्याचा पाठलाग करण्यासाठी उतरलेल्या बांगलादेशने 18.4 षटकांत 5 गडी गमावून हे लक्ष्य गाठले.
न्यूझीलंडच्या फलंदाजीची सुरुवात एकदम खराब झाली. न्यूझीलंडने 20 धावांत 4 विकेट गमावल्या. यानंतर जिमी नीशम (48) आणि मिचेल सँटनर (23) यांनी न्यूझीलंडचा डाव सावरला आणि संघाला सन्मानजनक धावसंख्येपर्यंत नेले.
बांगलादेशने तीन सामन्यांच्या टी-20 मालिकेत 1-0 अशी आघाडी घेतली आहे. यष्टिरक्षक फलंदाज लिटन दास या विजयाचा हिरो ठरला. त्याने सर्वाधिक 42 धावांची खेळी केली.
बांगलादेशकडून शरीफुल इस्लामने 4 षटकात 26 धावा देत 3 बळी घेतले. तर मुस्तफिझूर आणि मेहदी हसन यांना 2-2 विकेट्स मिळाल्या. तंजीम हसन शाकिब आणि रिशाद हुसेन यांना 1-1 विकेट मिळाल्या.
बांगलादेशने नुकताच न्यूझीलंडमध्ये पहिला एकदिवसीय विजय मिळवला होता. आता टी20 आंतरराष्ट्रीय सामन्यातही किवींचा पराभव केला आहे. न्यूझीलंडमध्ये बांगलादेशचा हा पहिला टी20 आंतरराष्ट्रीय विजय आहे.
