Asia Cup 2023 : भारत आणि पाकिस्तान यांच्यात आज अंतिम फेरीची लढत, कोण मारणार बाजी?
ज्युनिअर आशिया कप हॉकी 2023 स्पर्धेच्या अंतिम फेरीत आज पारंपरिक प्रतिस्पर्धी भारत आणि पाकिस्तान यांच्यात सामना होणार आहे. या सामन्याकडे क्रीडाप्रेमींच्या नजरा लागून आहेत.
ओमानमधील सलालाह स्पोर्ट्स कॉम्प्लेक्स येथे गुरुवारी (आज) पुरुषांच्या ज्युनियर आशिया चषक 2023 हॉकी फायनलमध्ये कट्टर प्रतिस्पर्धी भारत आणि पाकिस्तान भिडणार आहेत. ही लढत रात्री 9:30 वाजता सुरू होईल आणि भारतात थेट प्रक्षेपित होईल.
स्पर्धेत भारत आणि पाकिस्तान या दोन्ही संघांनी अपराजित राहून अंतिम फेरीत प्रवेश केला आहे. याआधी साखळी फेरीत दोन्ही संघ आमनेसामने आले होते आणि हा सामना 1-1 असा बरोबरीत सुटला होता. दुसरीकडे, पाकिस्तानपेक्षा जास्त गोल करत भारताने गटात अव्वल स्थान पटकावले आहे.
गतविजेत्या भारताने चीनवर 18-0 आणि जापानवर 3-1 असा विजय मिळवून आपल्या मोहिमेची सुरुवात केली. त्यानंतर गटातील थायलंडचा 17-0 असा पराभव केला. उपांत्य फेरीत कोरियन संघाचा 9-1 असा पराभव करत अंतिम फेरी गाठली.
दुसरीकडे, पाकिस्तान हॉकी संघाने पहिल्या सामन्यात चीनचा 15-1 असा पराभव केला. पुढच्या सामन्यात थायलंडचा 9-0 असा पराभव केला आणि अंतिम साखळी सामन्यात जापानला 3-2 ने पराभूत केले. उपांत्य फेरीत मलेशियाचा 6-2 असा पराभव केल्यानंतर आता अंतिम फेरीत पाकिस्तानची लढत भारताशी होणार आहे.
अंतिम फेरीत पाकिस्तानच्या अब्दुल रहमान आणि भारताच्या अरिजीत सिंग हुंदल यांच्याकडे लक्ष असेल. रहमानने 9 गोलसह संयुक्तिकरित्या सर्वाधिक गोल केले आहेत. तर सात गोलसह हुंदल दुसऱ्या स्थानावर आहे.
भारत आणि पाकिस्तान याआधी तीन वेळा हॉकीच्या ज्युनियर आशिया कपच्या फायनलमध्ये आमनेसामने आले आहेत. पाकिस्तानने 1996 मध्ये फायनल जिंकली होती, तर 2004 मध्ये भारताने बाजी मारली होती.
2015 मध्ये मलेशियामध्ये झालेल्या आशिया कप स्पर्धेत भारताने अंतिम फेरीत पाकिस्तानचा पराभव करून विजेतेपद पटकावले होते.
