ताप आलाय ? या घरगुती उपायांनी तापाचा पारा करा कमी
थंडीच्या दिवसात बऱ्याच लोकांना सर्दी , खोकला, तापाचा त्रास होतो. ताप आल्यावर लगेचच डॉक्टरांकडे जाणे शक्य नसेल तर घरातच काही उपाय करून शरीराचे वाढलेले तापमान कमी करता येऊ शकते.
थंडीत गार हवेमुळे अनेक लोक आजारी पडतात . काहींना सर्दी-खोकला तर काही लोकांना तापही येतो. ताप आल्यावर लगेचच डॉक्टरांकडे जाणे शक्य नसेल तर घरातच काही उपाय करता येऊ शकतात, ज्यामुळे तुम्हाला आराम मिळेल. या प्राथमिक उपचारांनी तुम्हाला तात्पुरतं बरं वाटेल, पुढील उपचारांसाठी डॉक्टरांचा सल्ला घ्यावा.
ताप आलेला असताना गार पाण्यात रुमाल बुडवून त्याची पट्टी कपाळावर ठेवावी. त्यामुळे ताप लवकर उतरण्यास मदत होते.
ताप कमी करण्यासाठी पाणी पिणेही फायदेशीर ठरते. पुरेशा प्रमाणात पाणी प्यायल्याने आपले शरीर हायड्रेटेड राहते आणि शरीरात असलेले विषारी घटक किंवा टॉक्सिन्सही बाहेर पडतात. तुम्ही फळांचा रस किंवा काढाही पिऊ शकता.
ताप आल्यावर हलके आणि सुती कपडे घालावेत. थंडी वाजते म्हणून अनेक जण जाड, उबदार कपडे घालतात. त्यामुळे शरीरातील तापमान कमी होण्यास मदत होत नाही. शरीराला पुरेसी हवा लागणं महत्त्वाचं असतं. तसंच ताप असताना रोजच्या रोज कपडे बदलावेत.
पुरेशी झोप घ्या. आजारी असताना तुम्ही जेवढा जास्त आराम कराल, तेवढे लवकर तुम्हाला बरं वाटेल. अशा परिस्थितीत शरीराला आरामाची खूप गरज असते.
कढत पाण्याने गुळण्या कराव्यात. यामुळे घसा शेकला जातो व तापही कमी होऊ शकतो. यासाठी एक ग्लास कढत पाण्यात थोडंस मीठ टाकून त्या पाण्याने गुळण्यात कराव्यात. तसेच कोणतीही औषधे डॉक्टरांच्या सल्ल्याशिवाय घेऊ नयेत.