“आजपासून तुम्ही स्वयंघोषित हिंदुजननायक!, अयोध्येला जायची गरज नाही”, दिपाली सय्यद यांचा राज ठाकरेंना टोला

मुंबई : शिवसेना नेत्या दिपाली सय्यद (Dipali Sayyad) त्यांच्या रोखठोक बोलण्यासाठी प्रसिद्ध आहेत. त्या सध्या विविध मुद्द्यांवरून विरोधी पक्षातील नेत्यांना धारेवर धरत आहेत. आता त्यांनी मनसे अध्यक्ष राज ठाकरे (Raj Thackeray) यांच्यावर निशाणा साधलाय. “आजपासून तुम्ही स्वयंघोषित हिंदुजननायक!, अयोध्येला (Ayodhya) जायची गरज नाही”, असं म्हणत दिपाली सय्यद यांनी राज ठाकरेंना टोला लगावला आहे.

दिपाली सय्यद यांचं ट्विट

राज ठाकरे यांचा अयोध्या दौरा रद्द झाला. त्यानंतर त्यांच्या रखडलेल्या अयोध्या दौऱ्यावर भाष्य केलंय. “आम्ही म्हणतोय ना तुम्हाला स्वयंघोषीत हिंदुजननायक मग अयोध्याला जायाची गरज काय आहे. आजपासून तुम्ही स्वयंघोषीत हिंदुजननायक!”, असं ट्विट दिपाली यांनी केलं आहे.

आम्ही म्हणतोय ना तुम्हाला स्वंयघोषीत हिंदुजननायक मग अयोध्याला जायाची गरज काय आहे. आजपासून तुम्ही स्वंयघोषीत हिंदुजननायक! @mnsadhikrut @ShivSena

— Deepali Sayed (@deepalisayed) June 12, 2022

राज ठाकरेंचा रखडलेला अयोध्या दौरा

काही दिवसांआधी राज ठाकरे यांनी अयोध्या दौऱ्याची घोषणा केली होती. त्यानंतर उत्तर प्रदेशमधले खासदार बृजभूषण सिंह यांनी थेट इशारा दिला. “राज ठाकरे यांनी भूमीपुत्रांचा मुद्दा पुढे करत उत्तर भारतीयांना हिणवलं. त्यामुळे अयोध्येत यायचं असेल तर माफी मागावी अन्यथा पाय ठेवू देणार नाही”, असं ओपन चॅलेंज बृजभूषण सिंह यांनी दिलं. आधी सौम्य वाटणारा हा विरोध नंतर तीव्र झाला. अखेर राज ठाकरे यांनी आपला अयोध्या दौरा रद्द झाल्याची घोषणा केली. याच मुद्द्याच्या आधारे दिपाली सय्यद यांनी राज ठाकरे यांना टोला लगावला आहे.

राज ठाकरे आणि हिंदुत्व

राज ठाकरे मागच्या काही दिवसांपासून हिंदुत्वाच्या बाबतीत अधिक आक्रमक झाल्याचं पाहायला मिळतंय. त्यांनी त्यांच्या जाहीर सभांमधून हिंदुत्वाचा आवाज अधिक दृढ केला. तर मस्जिदीवरच्या भोंग्याच्या मुद्द्यांवरून त्यांनी आवाज उठवला. शिवाय काही दिवसांआधी त्यांनी आपल्या पक्षाचा झेंडाही बदलला. आधी मनसेच्या झेंड्यावर रेल्वे इंजिन पाहायला मिळायचं. तर आता त्यांच्या झेंड्याचा रंग भगवा झालाय. शिवाय शिवमुद्रेचाही झेंड्यात समावेश केला.