Eknath Shinde : गुजरातमध्ये जरूर दांडिया खेळा, महाराष्ट्रात तलवारीला तलवार भिडेल, सामना अग्रलेखातून एकनाथ शिंदे गटाला इशारा
एकनाथ शिंदे विशेष विमानानं मुंबईत येणार असल्याची माहिती आहे.
मुंबई : शिवसेनेचे नेते एकनाथ शिंदे (Eknath Shinde) यांनी बंडखोरी केलं असून महाविकास आघाडी सरकार अल्पमतात येण्याची शक्यता निर्माण झाली आहे. एकनाथ शिंदे (Eknath Shinde) आणि शिवसेना (Shivsena)यांच्यातील वाद आता टोकाला जाण्याची शक्यता निर्माण झाली आहे. आता या सगळ्या प्रकरणावर दैनिक सामनाच्या अग्रलेखातून भाष्य करण्यात आलंय. तर यावेळी एकनाथ शिंदे गटाला इशाराही दिला आहे. यामुळे एकनाथ शिंदे गट आणि शिवसेना, हा वाद आणखी वाढण्याची शक्यता निर्माण झाली आहे. गुजरातच्या भूमीवरुन फडफड करणाऱ्यांनी हा इतिहास पुन्हा एकदा समजून घ्यावा. गुजरातमध्ये या मंडळींनी जरूर दांडिया खेळाव्या, पण महाराष्ट्रात तलवारीस तलवार भिडेल हे नक्कीच, असं दैनिक सामनाच्या अग्रलेखात म्हणत एकनाथ शिंदे गटाला इशारा देण्यात आलाय.
दैनिक ‘सामना’च्या अग्रलेखातून टीका
दैनिक सामनाच्या अग्रलेखातून एकनाथ शिंदे गटावर टीका करण्यात आली आहे. यात म्हटलंय की, ‘महाराष्ट्रातल्या सरकारचे काय व कसे होणार, हा प्रश्न नसून महाराष्ट्र वार करणाऱ्यांचे, महाराष्ट्राशी बेइमानी करणाऱ्यांचे काय होणार? फितुरीचे बीज रोवणाऱ्यांचे काय होणार? धर्माच्या मुखवट्याखाली अधर्माशी संग करणाऱ्यांना जनता माफ करेल काय? हे खरे प्रश्न आहेत. संकटांशी व वादळांशी सामना करण्याची शिवसेनेला सवय आहे. गुजरातच्या भूमीवरुन फडफड करणाऱ्यांनी हा इतिहास पुन्हा एकदा समजून घ्यावा. गुजरातमध्ये या मंडळींनी जरूर दांडिया खेळाव्या, पण महाराष्ट्रात तलवारीस तलवार भिडेल हे नक्कीच.’
एकनाथ शिंदे राज्यपालांना भेटणार
एकनाथ शिंदे विशेष विमानानं मुंबईत येणार असल्याची माहिती आहे. राज्यपालांची शिंदे भेट घेणार आहेत. यामुळे शिंदे गटाचे ठाकरे सरकारला धक्क्यांवर धक्के बसत असल्याचं दिसतंय. यातच आता मोठी माहिती समोर आली असून एकनाथ शिंदे दुपारनंतर मुंबईत येणार असल्याची माहिती आहे. आतापर्यंत संख्याबळाचं समीकरण जुळतं का, याकडे सगळ्यांचं लक्ष राहिलेलं होतं. दोन तृतीआंश आमदारांपेक्षा जास्त संख्याबळ हे एकनाथ शिंदेसोबत असणं गरजेचं होतं. 37 हा आकडा एकनाथ शिंदे यांना गाठायचा होता. आता त्यांनी स्वतःच आपल्याकडे 40 आमदार असल्याचं म्हटलंय. त्यामुळे महाविकास आघाडीला मोठा हादरा बसलाय. सत्तास्थापनेचा भाजपसोबत दावा एकनाथ शिंदे करतील, अशी शक्यता आहे. त्यासाठी ते मुंबईमध्ये दुपारी येतील. राज्यपालांची भेट घेतली, असंही सांगितलं जातं आहे. एका विशेष विमानाने एकनाथ शिंदे हे मुंबईला येणार असल्याचं कळतंय.