डिपॉझिट भरण्यासाठी 10 हजारांची चिल्लर आणली, मोजेपर्यंत अर्ज भरण्याची वेळ संपली

नाशिक : लोकसभा निवडणुकीचा फॉर्म भरण्यासाठी आज शेवटची तारीख असल्याने नाशिकमध्ये अनेक उमेदवारांनी आपले अर्ज दाखल केले. त्यात अपक्ष उमेदवारांची संख्याही बरीच होती. मात्र अपक्ष उमेदवार मंगेश ढगे आणि शिवाजी वाघ यांनी आपला उमेदवारी अर्ज दाखल करण्यासाठी आलेले असताना त्यांनी अर्ज भरण्यासाठी लागणाऱ्या 25 हजार रक्कमेपैकी मंगेश ढगे यांनी 25 हजार, तर शिवाजी वाघ यांनी 10 हजार रुपयांची चिल्लर आणली.

वाघ यांनी एक रुपयाचे 1900 नाणे आणले होते. दोन रुपयाचे 1450, तर पाच रुपयांचे 640 आणि दहा रुपयाचे 200 नाणे त्यांनी आणले. असे एकूण दहा हजार रुपयाची चिल्लर त्यांनी आणली होती. यामुळे हे उमेदवार चर्चेत आले. तर काही रक्कम ही रोख स्वरूपात आणली होती. ही सर्व चिल्लर पाहून अधिकारीही चक्रावून गेले आणि ही सर्व रक्कम मोजून आमच्याकडे द्या असे अधिकाऱ्यांनी उमेदवारांना सांगितले.

उमेदवारांनी आपल्या कार्यकर्त्यांकडून ही सर्व रक्कम मोजून घेतली आणि पुढील प्रक्रिया सुरू केली. मात्र ही प्रक्रिया झाल्यानंतर रक्कम देण्याच्या वेळी अधिकाऱ्यांनी वेळ संपल्याचं कारण समोर करत डिपॉझिट घेण्यास नकार दिला. यानंतर या उमेदवारांनी अधिकाऱ्यांसोबतच हुज्जत घातली.

रक्कम घेतली जाणार नाही असं उमेदवारांना सांगण्यात आलं. मात्र, “आम्ही तर लवकर आपल्या दालनात आलो होतो आणि सर्व प्रक्रियेस आपणच वेळ लावला. याबद्दल आपल्याला माहितीही दिली होती, तरीही तुम्ही आमची रक्कम का स्वीकारत नाही..आमची चूक नाही, आपण कर्मचारीही रक्कम मोजण्यासाठी दिले नाही आणि वेळ लागला तर आपण नकार देताय, असं करू नका,” अशी विनवणी उमेदवारांनी अधिकाऱ्यांकडे केली. मात्र वेळ संपल्यामुळे आम्ही घेणार नाही असा पवित्राच अधिकाऱ्यांनी घेतला. यामुळे निराश होऊन उमेदवारांनी आमच्यावर अन्याय होतोय, असं स्पष्ट शब्दात सांगितलं.

आपल्या कोणत्याही नियमात लिहिलेलं नाही की सुट्टी रक्कम घेतली जाणार नाही, असं असतानाही आमच्यावर असं बंधन लादत आमचे डिपॉझिट न घेणे म्हणजे हे जाणून बुजूनच केलं जातं आहे, असा आरोप शिवाजी वाघ यांनी केला. शिवाजी वाघ हे लाँड्रीचा व्यवसाय करतात, त्यामुळे आपल्याकडे सुट्टी रक्कम होती आणि मी त्यामुळे ती घेऊन आलो. फॉर्म भरण्याचा मलाही अधिकार आहे. तरीही अधिकारी असे करत असतील तर हे षडयंत्रच असल्याचा आरोप उमेदवारांनी केला. आमचं डिपॉझिट घेतलं नाही म्हणचे आमचा अर्जही बाद करणार हे निश्चित आहे. मात्र आम्ही आता न्यायलयात जाऊन दाद मागणार आहोत, म्हणजे एकमेव कारण फक्त आमची सुट्टी रक्कम जर ठरत असेल तर आमच्यावर अन्याय का असा प्रश्न उमेदवारांनी उपस्थित केला.