Rajya Sabha Election : आमदारांना सफारी गाडीची ऑफर, उस्मानाबादचे निटूरे करणार उमेदवारी दाखल
निटूरे यांनी त्यांच्या या ऑफरबाबत फेसबुक व इतर माध्यमातून पोस्ट केली आहे. त्यांच्या या ऑफरला कसा प्रतिसाद मिळतो हे लवकरच स्पष्ट होईल. निटूरे यांनी यापूर्वी वाराणसी मध्ये नरेंद्र मोदी यांच्यासह देवेंद्र फडणवीस यांच्या विरोधात उमेदवारी अर्ज दाखल करत निवडणूक लढविली होती.
उस्मानाबाद : राज्यसभेच्या सहा जागांसाठी निवडणूक (Rajya Sabha elections) होतेय. भाजपच्या तीनही उमेदवारांनी आपले अर्ज दाखल केले आहेत. तर राज्यात शिवसेना दोन, राष्ट्रवादी एक काँग्रेस एक असे तीन उमेदवार आहेत. त्यातच आता भाजपने आपला चौथा उमेदवार दिला आहे. त्यामुळे होऊ घातलेल्या राज्यसभा निवडणुकीत राजकीय रस्सीखेच व घोडेबाजार जोरात सुरु असताना उस्मानाबाद येथील एका राजकीय नेत्याने आमदारांना सफारी (Safari) गाडीची ऑफर दिली आहे. राष्ट्रीय किसान बहुजन पार्टीचे अध्यक्ष अरुण निटूरे हे उद्या 31 मे रोजी मुंबई विधानभवन (Vidhan Bhavan) येथे राज्यसभेचा उमेदवारी अर्ज दाखल करणार आहेत.
राज्यसभा निवडणूक
ऑफरबाबत फेसबुक व इतर माध्यमातून पोस्ट
राज्यसभा निवडणुकीत निटूरे यांना आमदारांनी सहकार्य केल्यास त्यांना प्रत्येकी एक टाटा सफारी गाडी भेट म्हणून देणार असल्याची त्यांची घोषणा आहे. निटूरे यांनी 45 सफारी गाड्यांचे कोटेशन सुद्धा घेतले असून प्रती गाडी 26 लाखप्रमाणे 11 कोटी 81 लाख खर्च रूपये ते खर्च करणार आहेत. निटूरे यांनी त्यांच्या या ऑफरबाबत फेसबुक व इतर माध्यमातून पोस्ट केली आहे. त्यांच्या या ऑफरला कसा प्रतिसाद मिळतो हे लवकरच स्पष्ट होईल. निटूरे यांनी यापूर्वी वाराणसी मध्ये नरेंद्र मोदी यांच्यासह देवेंद्र फडणवीस यांच्या विरोधात उमेदवारी अर्ज दाखल करत निवडणूक लढविली होती.
इतर पक्षांनी दिले उमेदवार
भाजपकडून धनंजय महाडिक, अनिल बोंडे, पियूष गोयल यांना उमेदवारी देण्यात आली आहे. पियूष गोयल यांनीही आपला अर्ज दाखल केला आहे. तर शिवसेनेकडून संजय पवार, संजय राऊत यांना उमेदवारी दिली आहे. तर राष्ट्रवादीच्या वाट्याला एक जागा जात असून ती प्रफुल्ल पटेल यांना देण्यात आली आहे. तर काँग्रेसने राज्यातील चेहऱ्याला संधी न देता उत्तर प्रदेशातील काँग्रेसचे मोठे नेते आणि ऊर्दू शायर म्हणून प्रसिद्ध असलेल्या इम्रान प्रतापगडी यांना संधी दिली आहे.
