मुंबईला पाणीपुरवठा करणाऱ्या धरणांमध्ये पुरेसा साठा, तरीही 10% पाणीकपात सुरू

मुंबईकरांसाठी एक महत्त्वाची बातमी समोर आली आहे. पावसाने पाठ फिरवल्यामुळे मुंबई शहरावरील 10% पाणीकपात कायम असणार आहे. मुंबईला पाणीपुरवठा करणाऱ्या सातही धरणांमध्ये सध्या एकूण 97% पाणीसाठा उपलब्ध आहे. हा उपयुक्त पाणीसाठा 14 लाख 47 हजार दशलक्ष लिटर इतका आहे. धरणांमध्ये मोठ्या प्रमाणात पाणीसाठा असूनही, पावसाच्या अनिश्चिततेमुळे आणि भविष्यातील पाणीपुरवठा नियोजन लक्षात घेता, प्रशासनाने पाणीकपात रद्द न करण्याचा निर्णय घेतला आहे.

सध्या मुंबईला पाणीपुरवठा करणाऱ्या विविध धरणांमधील पाणीसाठा पुढीलप्रमाणे आहे:
मोडक सागर: 85.71 %, तानसा: 96.50 %, अप्पर वैतरणा: 96.60 %, मध्य वैतरणा: 98.72 %, भातसा: 98.93 %,  विहार: 100 %,  तुळशी: 99.77 %

या आकडेवारीनुसार, विहार धरण पूर्ण भरले असून, इतर धरणांमध्येही चांगला पाणीसाठा आहे. मात्र, अपेक्षित पावसाच्या अभावी ही पाणीकपात अजूनही सुरू ठेवण्यात आली आहे, ज्यामुळे मुंबईकरांना पाणी जपून वापरण्याचे आवाहन करण्यात येत आहे.