Chhagan Bhujbal: साहेब निर्णय घ्या… नाशिकमध्ये लागले पोस्टर, समर्थक नाराज; भुजबळ निर्णय घेणार?
Chhagan Bhujbal: मंत्री छगन भुजबळ हे राष्ट्रवादीकडून राज्यसभेवर जाण्यास इच्छुक होते. मात्र ऐनवेळी त्यांचा पत्ता कट झाला. आता भुजबळ यांच्या समर्थकांनी नाराजी व्यक्त करत विरोध दाखवण्यास सुरुवात केली आहे.
राष्ट्रवादी काँग्रेसच्या राज्यसभा उमेदवारीवरून मोठी खळबळ माजली होती. उपमुख्यमंत्री सुनेत्रा पवार यांनी राजीनामा दिल्यानंतर ही जागा रिक्त झाली होती. राष्ट्रवादीमधून मंत्री छगन भुजबळ यांचीच राज्यसभेवर वर्णी लागेल अशी चर्चा गेले अनेक दिवस सुरू होती. मात्र, ऐनवेळी भुजबळ यांचा पत्ता कट झाला आणि भंडारा-गोंदिया मतदारसंघातून दोन वेळा विधान परिषद सदस्य राहिलेले राजेंद्र जैन यांच्या नावावर पक्षानं शिक्कामोर्तब केलं. NCP च्या या निर्णयामुळे भुजबळ नाराज असल्याच्या बातम्या समोर येत आहेत आणि त्यांच्या समर्थकांमध्ये मोठा रोष दिसून येत आहे.
नाशिकमधील पोस्टरने वेधले लक्ष
समोर आलेल्या माहितीनुसार, राज्यसभा तिकिट न मिळाल्याने छगन भुजबळ यांच्या समर्थकांनी नाराजी व्यक्त करत विरोध दाखवण्यास सुरुवात केली आहे. समर्थकांनी नाशिकच्या येवला शहरात ठिकठिकाणी पोस्टर्स लावले आहेत. त्यावर “साहेब, निर्णय घ्या” असे लिहिले आहे. या पोस्टर्सची राजकीय वर्तुळात जोरदार चर्चा होत आहे. शेवटच्या क्षणी छगन भुजबळ यांचे नाव राज्यसभा उमेदवारांच्या यादीतून बाहेर पडल्यानंतर समर्थकांमध्ये रोष वाढला आहे.
भुजबळांना राज्यसभेत पाठवण्याची तयारी होती
खरं तर, यावेळी पक्ष ज्येष्ठ नेते छगन भुजबळ यांना राज्यसभेत पाठवण्याची तयारी करत होता. पक्षात बैठकांचा सिलसिला सुरू झाल्यानंतर भुजबळ यांच्याशी राज्यसभेबाबत चर्चा झाली. तेव्हा त्यांनी स्पष्ट केले की, पुतण्या समीर भुजबळ यांना महाराष्ट्र मंत्रिमंडळात कॅबिनेट मंत्री बनवले तरच ते राज्यसभेत जातील. भुजबळ यांची ही मागणी पक्ष नेतृत्वाने मुख्यमंत्री देवेंद्र फडणवीस यांच्यापर्यंत पोहोचवली. फडणवीस यांनी दिल्लीत चर्चा करून निर्णय सांगण्याचे आश्वासन दिले. मात्र, दिल्लीत भुजबळ यांच्या या प्रस्तावाला मान्यता मिळाली नाही. फक्त एका व्यक्तीसाठी मंत्रिमंडळ विस्तार किंवा शपथविधी शक्य नसल्याचे सांगण्यात आले.
दरम्यान, राष्ट्रवादी काँग्रेसकडून अचानक राजेंद्र जैन यांच्या नावाची घोषणा करण्यात आली. त्यामुळे छगन भुजबळ नाराज असल्याच्या चर्चांना उधाण आले. यावर आता स्वतः छगन भुजबळ यांनी प्रतिक्रिया दिली आहे. त्यांनी स्पष्ट सांगितले की, आपल्याला लोकसभा आणि राज्यसभेत जाण्याची इच्छा होती. यापूर्वीही अनेकदा संधी जवळ आली पण मिळाली नाही. मात्र हे प्रकरण आता इतक्यावरच थांबलं नसून मोठं रुप घेत आहे. भुजबळांचे समर्थकांनी तीव्र नारीजी व्यक्त केली आहे. अनेक ठिकाणी थेट बॅनरबाजी करण्यात आली आहे. अनेक बॅनरवर साहेब आता निर्णय घ्या असं दिसून आलं आहे.
