अमरावती शिक्षक मतदारसंघात किरण सरनाईक यांची आघाडी कायम, 21 फेऱ्यांनंतर निकाल जवळपास निश्चित

अमरावती शिक्षक मतदारसंघाच्या निकालाकडे सर्वांचे लक्ष लागले असताना, शिंदे शिवसेनेचे उमेदवार किरण सरनाईक यांच्या विजयाची शक्यता जवळपास निश्चित मानली जात आहे. कौस्तुभ गावडे यांनी पुणे शिक्षक मतदारसंघात विजय मिळवल्यानंतर, आता अमरावतीमध्ये सरनाईक यांच्या नावाची जोरदार चर्चा आहे. मतमोजणीच्या सुरुवातीपासूनच किरण सरनाईक यांनी आघाडी घेतली होती. त्यांच्यासमोर अदिती पोहरे, श्रीकांत देशपांडे आणि इतर अनेक बंडखोरांचे आव्हान होते. मात्र, सरनाईक यांनी ही आघाडी कायम राखली आहे. तब्बल 21 फेऱ्यांची मतमोजणी पूर्ण झाली असून, ते सध्या मोठ्या मताधिक्याने आघाडीवर आहेत. यामुळे त्यांचा विजय अटळ असल्याचे चित्र स्पष्ट झाले आहे.

महायुतीने या निवडणुकीत आपली पूर्ण ताकद लावली होती. आमदार रवी राणा, बच्चू कडू, चंद्रशेखर बावनकुळे आणि मुख्यमंत्री एकनाथ शिंदे यांनी स्वतः मेळावे घेऊन सरनाईक यांच्यासाठी प्रचार केला होता. गेल्या सहा वर्षांपासून या मतदारसंघाचे आमदार असलेल्या किरण सरनाईक यांच्या नियोजनबद्ध कामांचाही या निकालावर परिणाम झाल्याचे बोलले जात आहे. अधिकृत घोषणेची आता प्रतीक्षा आहे.