DY Patil T20 Cup 2026: वैभव सूर्यवंशी -अर्जुन तेंडुलकरची विजयी खेळी, दोघांनी 48 चेंडूत ठोकल्या 118 धावा

डीवाय पाटील टी20 कप 2026 स्पर्धेत वैभव सूर्यवंशी आणि अर्जुन तेंडुलकरच्या फलंदाजीचं वादळ घोंघावलं. पहिल्यांदाच हे दोघं एकत्र एका संघात खेळले. या दोघांच्या झंझावाती खेळीमुळे संघाला विजयाची चव चाखता आली. वैभव सूर्यवंशी आणि अर्जुन तेंडुलकर या स्पर्धेत डीवाय पाटील ब्लू संघाकडून खेळत आहेत. अर्जुन तेंडुलकर डीवाय पाटील टी20 कप स्पर्धेत खेळला आहे. पण वैभव सूर्यवंशीचा डीवाय पाटील टी20 कप स्पर्धेचं पहिलं पर्व आहे. वैभव आणि अर्जुनने 25 फेब्रुवारीला झालेल्या सामन्यात इंडियन नेवी संघाच्या गोलंदाजांना सळो की पळो करून सोडलं. वैभव सूर्यवंशीने ओपनिंगला उतरत आक्रमक सुरूवात करून दिली. तर अर्जुन तेंडुलकरने सामना संपवला. या दोघांनी मिळून 48 चेंडूत 118 धावा केल्या आणि संघाला विजय मिळवून दिला.

इंडियन नेवी संघाने प्रथम फलंदाजी करताना 20 षटकात 219 धावा केल्या होत्या. तसेच विजयासाठी 220 धावांचं आव्हान ठेवलं होतं. या धावांचा पाठलाक करण्यासाठी डीवाय पाटील ब्लू संघाकडून वैभव सूर्यवंशी आणि यश ढुल ही जोडी मैदानात उतरली होती. या सामन्यात यश ढुलची विकेट झटपट मिळाली . पण वैभव सूर्यवंशी वादळ घोंघावलं. त्याने 19 चेंडूत 63 धावा केल्या. यात त्याने 5 षटकार आणि 7 चौकार मारले. त्याचा स्ट्राईक रेट हा 331.58 चा होता. त्याच्या या खेळीमुळे संघाच्या विजयाचा पाया रचला गेला. त्यानंतर अर्जुन तेंडुलकरने विजयाचा कळस चढवला.

अर्जुन तेंडुलकरने सातव्या क्रमांकावर फलंदाजीला येत 29 चेंडूत नाबाद 55 धावा केल्या. यावेळी त्याचा स्ट्राईक रेट हा 189.66 चा होता. यावेळी त्याने 7 चौकार आणि 2 षटकार मारले. हा सामना शेवटच्या षटकापर्यंत गेला होता. या षटकाच्या पहिल्या चेंडूवर अर्जुन तेंडुलकरने षटकार मारला आणि विजयाची नोंद केली. वैभव सूर्यवंशी आणि अर्जुन तेंडुलकर पहिल्यांदाच एकत्र खेळले. या सामन्यात दोघांनी आपली आक्रमकता दाखवली. या दोघांनी डीवाय पाटील ब्लूसाठी 48 चेंडूत 118 धावा केल्या. यात 7 षटकार आणि 14 चौकार मारले. आयपीएल स्पर्धेत दोघंही वेगवेगळ्या फ्रेंचायझीकडून मैदानात उतरणार आहेत. वैभव सूर्यवंशी राजस्थान रॉयल्स, तर अर्जुन तेंडुलकर लखनौ सुपर जायंट्सकडून खेळणार आहे.