Rishabh Pant: ‘या मुलाला Free सोडा ते सुपरमॅन’, ऋषभला भारतीय खेळाडुंनी आपल्या स्टाइलमध्ये केला सलाम

केपटाऊन: दक्षिण आफ्रिकेविरुद्ध केपटाऊन कसोटीत (Capetown test) आज ऋषभ पंतने (Rishabh pant) धमाकेदार शतक झळकावलं. अत्यंत कठीण परिस्थितीत ऋषभने झळकावलेल्या या शतकाचं मोल खूप मोठं आहे. कारण मालिकेचा निकाल लावणाऱ्या निर्णायक कसोटीत ऋषभ पंतने ही खेळी केली. एकाबाजूला संघाची पडझड़ सुरु असताना ऋषभ एखाद्या पहाडासारखा विकेटवर टिकून राहिला व शानदार शतक झळकावलं.

या शतकाआधी ऋषभने बरचं काही ऐकलय. त्यामुळे या शतकाचं मोल विशेष आहे. ऋषभने केपटाऊनच्या न्यूलँडस मैदानावर शानदार शतक झळकावल्यानंतर भारतीय क्रिकेटपटूंनी एकापेक्षा एक सरस टि्वट करुन ऋषभचं कौतुक केलं.

“हे अविश्वसनीय शतक आहे. त्याने एकहाती भारताला सामन्यात ठेवलं. फक्त X फॅक्टरच नाही, तर ऋषभ कसोटी क्रिकेटमधील भारताचा मोठा मॅच विनर आहे. या मुलाला फ्रि सोडा” असं सेहवागने आपल्या टि्वटमध्ये म्हटलं आहे.

“परदेशातील वातावरणात ऋषभने पुन्हा एकदा आपली क्षमता सिद्ध केली आहे. सर्व टीकाकारांना उत्तर दिलं आहे. या टॅलेंटेड खेळाडूच्या पाठिशी उभ राहण्याचं सर्व श्रेय कर्णधार आणि कोचला जातं” असं वेणूगोपाल रावने आपल्या टि्वटमध्ये म्हटलं आहे.