IPL 2026 : दिल्ली कॅपिटल्सचं मोठं नुकसान, 11.75 कोटींची गुंतवणूक पाच सामन्यात वाया

आयपीएल स्पर्धेच्या इतिहासात दिल्ली कॅपिटल्सने अद्याप एकदाही जेतेपदावर नाव कोरलेलं नाही. त्यामुळे मागच्या काही वर्षात फक्त प्रयत्नच सुरू आहेत. मागच्या पर्वात दिल्ली कॅपिटल्सने चांगली सुरूवात केली होती. मात्र त्यानंतर गाडी रूळावरून घसरली आणि प्लेऑफमध्ये जागा मिळवता आली नाही. यंदाही दिल्ली कॅपिटल्सने चांगली सुरूवात केली आहे. पहिल्या सामन्यात लखनौ सुपर जायंट्स आणि मुंबई इंडियन्सला पराभूत केलं आहे. या सामन्यात स्टार गोलंदाज नसताना दिल्ली कॅपिटल्सने हा विजय मिळवला आहे. ऑस्ट्रेलियाचा वेगवान गोलंदाज मिचेल स्टार्क अजूनही संघात रूजू झालेला नाही. अशा स्थितीत दिल्ली कॅपिटल्सची धाकधूक वाढली आहे. कारण दिल्ली कॅपिटल्सची गाडी विजयी रूळावरून घसरू नये यासाठी चांगल्या गोलंदाजाची गरज आहे. असं असताना दिल्ली कॅपिटल्सला मोठा धक्का बसला आहे. मिचेल स्टार्क आणखी तीन सामन्यांना मुकणार आहे. आधीच दोन सामने खेळला नाही. त्यात आणखी तीन सामन्यात गैरहजर असणार आहे.

एशेज कसोटी मालिका 2025-2026 स्पर्धेत मिचेल स्टार्कच्या खांद्याला आणि कोपराला दुखापत झाली होती. त्याच्यावर सध्या ऑस्ट्रेलियात उपचार सुरू आहेत. तसेच पूर्ण बरा झाल्याशिवाय मैदानात उतरणार नाही. अशा स्थितीत पुढच्या तीन सामन्यात खेळणार नसल्याची माहिती समोर आली आहे. मिचेल स्टार्क 8 एप्रिलला गुजरात टायटन्स, 11 एप्रिलला चेन्नई सुपर किंग्स आणि 18 एप्रिलला आरसीबीविरुद्दच्या सामन्यात खेळणार नाही. मिचेल स्टार्क पूर्णपणे बरा झाल्यावरच 21 एप्रिल रोजी सनरायझर्स हैदराबादविरुद्धच्या सामन्यात खेळेल. याचा अर्थ मिचेल स्टार्कचे आयपीएलमध्ये खेळणं अजूनही निश्चित नाही.

मिचेल स्टार्कला संघात घेण्यासाठी दिल्ली कॅपिटल्सने 11.75 कोटी मोजले होते. पण साखळी फेरीतील निम्म्या सामन्यात खेळणार नाही हे स्पष्ट आहे. त्यामुळे दिल्ली कॅपिटल्सचं मोठं नुकसान होत आहे. त्याच्या गैरहजेरीत मुकेश कुमार, टी. नटराजन आणि लुंगी एनगिडी वेगवान गोलंदाजीची धुरा सांभाळत आहेत. पण मिचेल स्टार्कची उणीव कुठे ना कुठे भासत आहे. मिचेल स्टार्क संघात असला तर डेथ ओव्हरमध्ये एक प्रभावी गोलंदाज ताफ्यात असेल.