मुंबई: IPL 2022 च्या 51 व्या सामन्यात मुंबई इंडियन्सने (Mumbai Indians) गुजरात टायटन्सला 5 धावांनी हरवलं. मुंबई इंडियन्सच्या या दुसऱ्या विजयात इशान किशन, रोहित शर्मा (Rohit sharma) आणि टिम डेविड यांनी दमदार प्रदर्शन केलं. गोलंदाजीत डॅनियल सॅम्सने आपला जलवा दाखवला. या विजयात एक खेळाडू मात्र पूर्णपणे फ्लॉप ठरला. हा खेळाडू दुसरा-तिसरा कोणी नसून, कायरन पोलार्ड आहे. कायरन पोलार्डचा खराब फॉर्म संपतच नाहीय. आता प्लेइंग इलेवनमधील त्याची जागा सुद्धा धोक्यात आहे. पोलार्डने काल गुजरात टायटन्स विरुद्धच्या सामन्यात 14 चेंडूत फक्त 4 धावा केल्या. पोलार्डला राशिद खानने बोल्ड केलं. पोलार्डचं लेग स्पिनरसमोर फेल होणं, अजिबात नवीन नाहीय. मागच्या काही काळापासून फ्रेंचायजी असो किंवा इंटरनॅशनल क्रिकेटमध्ये लेग स्पिनर्सनी पोलार्डला खूप त्रास दिलाय. गुजरात विरुद्ध सुद्धा हेच घडलं.
कायरन पोलार्डची बॅट आयपीएल 2022 मध्ये तशी शांतच आहे. पोलार्डने 10 सामन्यात फक्त 129 धावा केल्या आहेत. त्याची सरासरी 14.33 आहे. पोलार्डचा स्ट्राइक रेट 110 पेक्षा कमी आहे. विशेष म्हणजे पोलार्डची सर्वाधिक धावसंख्या फक्त 25 आहे. कायरन पोलार्डची सर्वात मोठी समस्या ही आहे की, त्याच्यासारखीच फलंदाजी करणारा टिम डेविड दमदार प्रदर्शन करतोय.
टिम डेविडने गुजरात टायटन्स विरुद्धच्या सामन्यात 21 चेंडूत नाबाद 44 धावा केल्या. यात चार षटकार आणि दोन चौकार होते. लखनौ विरुद्ध सुद्धा डेविडने दमदार कामगिरी करुन संघाच्या विजयात महत्त्वाची भूमिका बजावली होती.