IPL 2026 स्पर्धेपूर्वी केकेआरचा खेळाडू अडचणीत, पत्रकारासोबत राडा आणि थेट बोर्डाकडे तक्रार

आयपीएल 2026 स्पर्धेला 28 मार्चपासून सुरूवात होणार आहे. या स्पर्धेसाठी आता मोजून 10 दिवस शिल्लक राहिले आहेत. त्यामुळे प्रत्येक फ्रेंचायझी जेतेपदाचं स्वप्न उराशी बाळगून जोरदार सराव करत आहेत. काही फ्रेंचायझींची मागच्या पर्वात सुमार कामगिरी राहिली होती. त्याची कसर भरून काढण्याचा यंदाच्या पर्वात प्रयत्न आहे. असं असताना कोलकाता नाईट रायडर्सच्या गोटातून एक बातमी समोर आली आहे. केकेआरचा एक खेळाडू अडचणीत आला आहे. हा खेळाडू दुसरा तिसरा कोणी नसून ऑस्ट्रेलियाचा अष्टपैलू कॅमरून ग्रीन आहे. त्याच्यासाठी कोलकाता नाईट रायडर्सने 25.20 कोटी मोजले असून संघात घेतलं आहे. पण हा स्टार खेळाडू आता वेगळ्याच कारणामुळे चर्चेत आला आहे. नेमकं काय झालं ते जाणून घेऊयात..

कॅमरून ग्रीन ऑस्ट्रेलियात सुरू असलेल्या देशांतर्गत शेफील्ड शील्ड स्पर्धेत खेळत आहे. या स्पर्धेतील एका सामन्यानंतर झालेल्या मुलाखतीत ग्रीनने ऑस्ट्रेलियन पत्रकाराशी वाद घातला. त्यामुळे चर्चेत आला आहे. सिडनीत पार पडलेल्या वेस्ट ऑस्ट्रेलिया आणि न्यू साउथ वेल्स या सामन्याच्या निकालानंतर ही घटना घडली. या सामन्यात ग्रीनचा झंझावात पाहायला मिळाला. त्याने 135 धावांची शतकी खेळी केली. मागच्या वर्षी ऑगस्ट महिन्यात केलेल्या कामगिरीनंतर हे पहिलं शतक आहे. सामनावीराचा पुरस्कार मिळाल्यानंतर मीडियाला कॅमरूनसोबत संवाद साधण्यासाठी बोलवलं गेलं. पण कॅमरून ग्रीन या पत्रकार परिषदेला उशिरा आला. इतकंच काय तर मुलाखत पटापट आटपण्यास सांगितलं.

कॅमरून ग्रीनने यावेळी फॉर्मात परतल्याने आनंदी असल्याचं सांगितलं. इतकंच काय तर संघाच्या विजयाची इच्छाही व्यक्त केली. पण जेव्हा पत्रकारांनी ग्रीनला फलंदाजीच्या संघर्षाबाबत विचारले तेव्हा त्याने उत्तर देण्यास नकार दिला. ही मुलाखत फक्त 1 मिनिटं चालली आणि वेळ फुकट गेला असं सांगत निघला. पण त्याला पत्रकाराने अडवलं आणि दिवसभर आम्ही वाट पाहात होतो असं सांगितलं. तेव्हा ग्रीन उद्धटपणे म्हणाला की, तुम्ही मलाच का लक्ष्य करत आहात? वाद वाढत असल्याचं पाहून सहाय्यक प्रशिक्षक ब्यू कॅसन यांनी उडी घेतली. तसेच पत्रकारांची माफी मागितली. ग्रीन निघून गेल्यानंतर प्रकरण शांत झालं. पण काय घडलं त्याबाबत क्रिकेट ऑस्ट्रेलियाला माहिती देण्यात आली आहे. आता बोर्ड काय कारवाई करते? याकडे लक्ष असेल.