IPL 2022 : विश्वास तरी कुणावर ठेवावा! पोस्टमास्टरनं 24 कुटुंबियांचे पैसे लावले सट्टेबाजारी

आयपीएलमध्ये सट्टेबाजार?

Image Credit source: social

मुंबई : आयपीएलच्या (IPL 2022) पंधराव्या सीजनमध्ये यापूर्वी एक सट्टेबाजीचं (Betting) वृत्त पाकिस्तानमधून मिळालेल्या माहितीच्या आधारे समोर आलं होतं. यानंतर आता पुन्हा एक वृत्त हाती आलं असून एका पोस्टमास्टरनं (postmaster) तब्बल एक कोटी रुपये गमावले आहेत. या पोस्टमास्टरनं सट्टेबाजीसाठी तब्बल 24 कुटुंबांची एक कोटी रुपायांची बचत पणाला लावल्याचा आरोप करण्यात आलाय. त्यामुळे अशा प्रलोभनांना बळी न पडण्याचं आवाहन करण्यात आलंय. विशेष म्हणजे पोस्टरमास्टरवर लोकांनी विश्वास ठेवला. मात्र, हाच विश्वास त्यांना चांगलाच महागात पडलाय. हा सट्टेबाजार मध्य प्रदेशातील एका पोस्टमास्टरने केला आहे. एक कोटी रुपये पोस्टमास्टरने गमावल्याने तब्बल 24 कुटुंबियांना याचा फटका सहन करावा लागतोय.

नेमकं प्रकरण काय?

मध्य प्रदेशमधील सागर जिल्ह्यातील सब पोस्ट ऑफिसमध्ये 24 कुटुंबांना मुदत ठेवीचे पैसे जमा करायचे होते. पोलिसांनी सांगतिलेल्या माहितीनुसार, या पोस्टमास्टरने या पैशांचा सट्टा खेळला. बीना सब पोस्ट ऑफिसचे पोस्टमास्टर विशाल अहिरवार यांना बीना रेल्वे पोलिसांनी अटक केली आहे. पोलिसांसमोर पोस्टमास्टरने गुन्ह्याची कबुली दिल्याचं सांगण्यात येत आहे. एनडीटीव्हीच्या वृत्तानुसार, पोलिसांना सांगितलं की, पोस्टमास्टरने बनावट एफडी खात्यांसाठी खरे पासबुक जारी केले होते. मागील दोन वर्षांपासून सर्व पैसे आयपीएल क्रिकेट सट्ट्यांमध्ये गुंतवले. बीना जीआरपी स्टेशन प्रभारी अजय धुर्वे यांनी ही माहिती दिली. ही घटना उघडकीस आल्यानंतर गुंतवणूकदारांचे लाखे रुपये बुडल्याने त्यांची अवस्था बिकट झाली आहे.

अनेक कुटुंबांचं  नुकसान

अटक करण्यात आलेल्या सब पोस्टमास्टर विशाल अहिरवारवर आता कलम 420 आयपीसी आणि 408 आयपीसी अंतर्गत आरोपांवरुन त्यांना निलंबित करण्यात आलं आहे. यातील एका तक्रारदार महिलेनं सांगतिलं की, मी कोरोनामुळे पती आणि सासरे गमावले आहेत. माझ्या पतीने मृत्यूपूर्वी नऊ लाख रुपये जमा केले होते. परंतु मला नुकतेच विशाल अहिरवारच्या फसवणुकीची माहिती मिळाली आहे. यानंतर मी पोस्ट ऑफिसमध्ये गेले. तिथं मला सांगण्यात आलं की मुदत ठेव खाते क्रमांक अस्तित्वात नाही. माझे पती आणि सासरे आता हयात नाहीत. मला आता काय करावं हे समजत नाहीये.