Crude Oil : रशियाकडून कच्चे तेल खरेदी करु नये यासाठी भारतावर कोणाचा दबाव? काय म्हणाले केंद्रीय पेट्रोलियम मंत्री..
Crude Oil : रशियाकडून कच्चे तेल खरेदी करु नये यासाठी भारतावर कोणाचा दबाव आहे? काय म्हणाले केंद्रीय पेट्रोलियम मंत्री..पाहुयात..
नवी दिल्ली : आंतरराष्ट्रीय बाजारात कच्चा तेलाचे (Crude Oil Market) भाव पुन्हा एकदा भडकले आहेत . तर ओपेक संघटनेने (OPEC) कच्चा तेलाचे उत्पादन कमी करण्याचे धोरण स्वीकारले आहे. त्यातच रशियाकडून कच्चे तेल खरेदी करु नये यासाठी भारतावर दबाव वाढल्याच्या बातम्या येऊन धडकल्या. त्यावर केंद्रीय पेट्रोलियम (Petroleum Minister) मंत्र्यांनी उत्तर दिले आहे..
रशियाकडून कच्चे तेल खरेदी न करण्यासाठी भारतावर दबाव असल्याच्या बातम्या येऊन धडकल्यानंतर केंद्रीय पेट्रोलियम मंत्री हरदीप सिंह पुरी यांनी यावर खणखणीत उत्तर दिले आहे. भारताला कोणीही कच्चे तेल खरेदीपासून रोखलेले नाही.
एवढेच काय, तर ज्या देशाकडून भारताला इंधन खरेदी करायचे आहे, त्या देशाकडून भारत कोणालाही न जुमानता तेल खरेदी करणार असल्याची रोकठोक भूमिकाही पेट्रोलियम मंत्र्यांनी जाहीर केली. त्यामुळे भारतावर कोणाचा दबाव हे स्पष्ट झालं नसलं तरी भारत कोणाला जुमणणार नाही हे स्पष्ट झालं आहे.
युक्रेनवरील हल्ल्यानंतर पश्चिमी देशांनी रशियाकडून कच्चे तेल खरेदी करणे बंद केले आहे. त्यामुळे रशियाच्या कच्चा तेलाचे दर कोसळले आहेत. अशा परिस्थितीत चीन आणि भारत कमी किंमतीत रशियाकडून कच्चे तेल खरेदी करत आहे. सध्या भारत जगातील तिसरा सर्वात मोठा तेल आयात करणारा देश ठरला आहे.
देशातील नागरिकांचे हित सर्वोपरी असल्याचा दावा करत केंद्र सरकारने रशियाकडून तेल खरेदी रोखण्याचा अमेरिकेचा प्रस्ताव फेटाळून लावला आहे. नागरिकांना किफायतशीर दरांनी पेट्रोल-डिझेलचा पुरवठा करणे ही सरकारची नैतिक जबाबदारी असल्याचे केंद्राने स्पष्ट केले आहे. त्यामुळे येत्या काही दिवसात भारत रशियाकडून तेल आयात सुरुच ठेवले हे स्पष्ट झाले आहे.
