Abhijeet Dipke At Delhi : मुंबईतून दिल्लीला पोहोचले अन् विमानातच पोलिसांची कारवाई; अभिजीत दिपकेंना पोलिसांनी ताब्यात घेतलं

दिल्लीत सीजेपी आंदोलनाच्या पार्श्वभूमीवर, या आंदोलनाचे संस्थापक अभिजीत दीपके यांना दिल्ली पोलिसांनी विमानतळावरच विमानातून ताब्यात घेतले आहे. मुंबईहून दिल्लीला पोहोचलेल्या दीपके यांना विमान दिल्ली विमानतळावर उतरताच, पोलीस थेट विमानात पोहोचले आणि त्यांना अटक केली.

या कारवाईत अभिजीत दीपके यांच्यासोबत आशुतोष रांका आणि सौरव दास यांनाही ताब्यात घेण्यात आले आहे. हे सर्वजण जंतरमंतरवर होणाऱ्या आंदोलनासाठी दिल्लीत दाखल झाले होते. दीपके यांनी मुंबईत असतानाच पोलिसांना आव्हान दिले होते की, त्यांना अटक करायची असेल तर मुंबईतच करावी. दिल्लीत पोहोचल्यावर त्यांनी पोलिसांना आ जाओ, कर लो अरेस्ट असे खुले आव्हान दिले. त्यांनी या घटनेला हुकूमशाही असे संबोधत, इंदिरा गांधींच्या काळातही असे झाले नव्हते अशी टिप्पणी केली. दिल्ली पोलिसांनी विमानात घुसून केलेली ही कारवाई लक्षवेधी ठरली असून, यामुळे राजकीय वर्तुळात चर्चांना उधाण आले आहे.