Abu Azmi : माझे कपडे फाडले पण हवं तेच मी केलं… भिवंडीतील भाषा वादावर आझमी म्हणाले, मराठी बोलायचं की नाही माझी इच्छा पण…

समाजवादी पक्षाचे नेते अबू आझमी यांनी नुकतेच माध्यमांशी संवाद साधताना मराठी भाषेवरील आपल्या भूमिकेबाबत स्पष्टीकरण दिले आहे. ते म्हणाले की, मी मराठी शिकत आहे, पण कुणाच्या भीतीपोटी नाही. २०१५ मध्ये त्यांचे कपडे फाडले गेले होते, तरीही त्यांनी आपले मत मांडले होते. भिवंडीमध्ये मराठी बोलण्याची गरज काय, असा सवाल त्यांनी उपस्थित केल्याने मराठी-हिंदी वाद पुन्हा पेटला होता.

आझमींनी स्पष्ट केले की, अनेक पत्रकार एकाचवेळी उपस्थित असल्याने हिंदीत बोलणे पसंत केले. त्यांचे म्हणणे होते की, मराठी केवळ महाराष्ट्रापुरती मर्यादित राहील, तर हिंदीतून बोलल्यास त्यांची भूमिका देशभरात पोहोचेल. त्यांना मराठी भाषेबद्दल आदर असून ते ती शिकत आहेत, पण कोणाच्या दबावामुळे नाही. भाषेच्या राजकारणाऐवजी महाराष्ट्रातील शेतकरी आत्महत्या, बेरोजगारी आणि पूर परिस्थिती यांसारख्या गंभीर प्रश्नांवर सरकारने लक्ष द्यावे, असे आझमींनी नमूद केले. मनसेसह इतर पक्षांच्या टीकेला उत्तर देण्यास त्यांनी नकार दिला.