Santosh Deshmukh Murder : दादा वडिलांच्या क्रूर हत्येला 1 वर्ष, तरीही… वैभवी देशमुखचं दादांकडे साकडं, नेमकं काय म्हणाली?

बीडमध्ये संतोष देशमुख यांच्या हत्येला एक वर्ष पूर्ण झाले असले तरी पीडित कुटुंब अद्याप न्यायाच्या प्रतीक्षेत आहे. आज प्रथम पुण्यतिथीनिमित्ताने राज्याचे उपमुख्यमंत्री अजित पवार यांनी मस्साजोग येथे देशमुख यांच्या कुटुंबीयांची भेट घेतली. यावेळी संतोष देशमुख यांच्या मुलीसह कुटुंबीयांनी प्रशासनाच्या निष्क्रियतेबद्दल तीव्र नाराजी व्यक्त केली आहे. त्यांच्या मते, या प्रकरणात अपेक्षित प्रतिसाद मिळत नाहीये, ज्यामुळे त्यांना न्याय मिळवण्यासाठी सतत झगडावे लागत आहे.  संतोष देशमुख यांचे बंधू धनंजय देशमुख यांनी सांगितले की, त्यांनी या संदर्भात अनेकवेळा संपर्क साधला, परंतु त्यांच्या तक्रारींकडे दुर्लक्ष केले जात आहे.

देशमुख यांनी स्वतःच्या पातळीवर या प्रकरणाच्या पाठपुराव्यासाठी अनेक प्रयत्न केले आहेत. त्यांनी सांगितले की, त्यांना अनेक गोष्टींचा गवगवा न करता, गोपनीय पद्धतीने माहिती देण्याचे प्रयत्न केले. आपल्या गावच्या लोकांना मदत केली, परंतु या सगळ्या प्रयत्नांना अपेक्षित यश मिळत नसल्याची खंत त्यांनी व्यक्त केली. कुटुंबीयांची अपेक्षा आहे की त्यांना रोज काहीतरी नवीन अपडेट मिळावे, चौकशी कशा प्रकारे सुरू आहे, याची माहिती मिळावी. मात्र, प्रशासनाकडून तपासाची गती वाढवण्यासाठी कोणतीही ठोस पाऊले उचलली जात नसल्याचे त्यांचे म्हणणे आहे.