विलिनीकरणापूर्वीच अजित पवारांचे आमदार शरद पवारांच्या राष्ट्रवादीच्या संपर्कात?

राष्ट्रवादी काँग्रेसमधील विलिनीकरणाच्या चर्चांनी महाराष्ट्राचे राजकारण ढवळून निघाले आहे. या संदर्भात रोहित पवार यांनी अजित पवारांसोबत झालेल्या बैठका आणि करारांबाबत पुरावे सादर करण्यासाठी आज पत्रकार परिषद घेणार होते, मात्र ती दुसऱ्यांदा पुढे ढकलण्यात आली आहे. आता ही पत्रकार परिषद सोमवार किंवा मंगळवारी मुंबईत होणार असल्याचे रोहित पवारांनी सांगितले आहे.

रोहित पवारांच्या मते, 12 फेब्रुवारीला विलिनीकरणाची घोषणा होणार होती आणि त्यांच्याकडे याबाबत सखोल आणि पुराव्यासह माहिती आहे. ही पत्रकार परिषद पुढे ढकलण्यामागे काही कारणे दिली जात आहेत. उपमुख्यमंत्री सुनेत्रा पवार यांची आमदारांसोबत बैठक असल्याने विलिनीकरणाचा मुद्दा चर्चेत येऊ शकतो, असे एक कारण सांगितले जात आहे. दुसरे कारण असे की, अजित पवारांच्या गटातील अनेक आमदार शरद पवारांच्या राष्ट्रवादी काँग्रेसच्या संपर्कात असल्याची माहिती सूत्रांनी दिली आहे. यामुळे शरद पवारांची राष्ट्रवादी विलिनीकरणाच्या मुद्द्यावर वेट अँड वॉचच्या भूमिकेत असल्याचे दिसते. अनेक आमदारांना भविष्याची चिंता सतावत असून, त्यांनी सुप्रिया सुळे यांची भेट घेतल्याचेही वृत्त आहे.