Ambernath Accident : शिंदेंच्या उमेदवाराच्या कारचा अपघात, 4 मृत्यू; सभेसाठी जाताना अंबरनाथ फ्लायओव्हरवर घडलं काय?

अंबरनाथमध्ये शिंदे गटाच्या शिवसेना उमेदवार किरण चौबे यांच्या गाडीचा अंबरनाथ फ्लायओव्हरवर भीषण अपघात झाला. या दुर्घटनेत चार जणांचा दुर्दैवी मृत्यू झाला असून उमेदवार किरण चौबे जखमी झाल्या आहेत. किरण चौबे बुवापाडा येथून नगरसेवक पदासाठी निवडणुकीच्या रिंगणात होत्या.

प्राथमिक माहितीनुसार, अंबरनाथ पूर्व-पश्चिमला जोडणाऱ्या पुलावर हा अपघात घडला. गाडीत बसलेल्या किरण चौबे सभेसाठी जात असताना चालकाला हृदयविकाराचा झटका आला. यामुळे चालक लक्ष्मण शिंदे यांचे गाडीवरील नियंत्रण सुटले आणि अनियंत्रित कारने अनेक दुचाकींना धडक दिली.

या अपघातात चालक लक्ष्मण शिंदे, अंबरनाथ महापालिकेचे दोन कर्मचारी आणि एक पादचारी यांचा मृत्यू झाला. तर इतर तीन जण जखमी झाले. किरण चौबे यांना तातडीने कल्याण येथील फोर्टिस रुग्णालयात दाखल करण्यात आले असून त्यांची प्रकृती स्थिर असल्याचे नातेवाईकांनी सांगितले आहे. पोलिसांनी या घटनेची नोंद घेतली असून तपास सुरू केला आहे. अपघातामुळे परिसरात काही काळ तणावाचे वातावरण होते.