राजकारण गलिच्छ पद्धतीने सुरूय! अंजली दमानियांचा गंभीर आरोप

अंजली दमानिया यांनी महाराष्ट्रातील सध्याच्या राजकीय परिस्थितीवर आपली नाराजी व्यक्त केली आहे. राजकारणात नेमके काय चालले आहे हेच कळत नाही, असे त्यांनी म्हटले आहे. सध्याच्या घडामोडी अत्यंत गलिच्छ आणि किळसवाण्या पद्धतीने घडत असल्याचा आरोप दमानिया यांनी केला.

दमानिया यांच्या मते, राजकारणात सर्वांना गुंडांची गरज भासते. राजकीय नेत्यांची गुंडांबरोबर छायाचित्रे दिसतात. दहशतीचे वातावरण निर्माण करून राज्य करायचे असल्याने लोकशाहीत असे प्रकार घडत असल्याचे त्यांचे म्हणणे आहे. या परिस्थितीत लोक त्रस्त असून, आता या राजकारणाचे काय करायचे, असा प्रश्न त्यांना पडला आहे.

या संदर्भात निलेश घायवळ प्रकरणावर बोलताना दमानिया यांनी प्रतिक्रिया दिली. देवेंद्र फडणवीस यांनी घायवळ यांना परवाना किंवा पासपोर्ट दिला नसल्याचे सांगितले असले तरी, तो गायब कसा झाला किंवा लंडनला कसा पळाला, हे कळत नाही असे दमानिया म्हणाल्या. बंदुकीचा परवाना रद्द केलेला असतानाही तो कसा दिला गेला, याबाबत त्यांनी प्रश्न विचारला. गृहमंत्र्यांकडून अशा परवानग्या दिल्या जात असतील, तर नंतर सारवासारव करून परवानगी दिलीच नाही असे का सांगितले जाते, यावरही त्यांनी बोट ठेवले. राजकारणातील हे चित्र बदलण्याची खरी गरज आहे, परंतु कोणताही राजकारणी त्यासाठी पुढाकार घेताना दिसत नाही, असेही दमानिया यांनी नमूद केले.