Santosh Deshmukh Case Video : मस्साजोगच्या ग्रामस्थांचं आजपासून अन्नत्याग, आंदोलनकर्त्यांच्या 7 प्रमुख मागण्या काय?

बीड जिल्ह्यातील केज तालुक्यातील मस्साजोगमधून एक मोठी बातमी आहे. मस्साजोगच्या ग्रामस्थांकडून आजपासून आक्रमक पवित्रा घेण्यात आला आहे. मस्साजोगच्या ग्रामस्थांनी आजपासून अन्नत्याग आंदोलनाची घोषणा केली आहे. आज सकाळी दहा वाजल्यापासून बीड जिल्ह्यातील केज तालुक्यातील मस्साजोगमधील ग्रामस्थ अन्नत्याग करणार आहेत. सरपंच संतोष देशमुख हत्या प्रकरणातील प्रमुख ७ मागण्यासांठी मस्साजोगचे ग्रामस्थ अन्नत्याग आंदोलन करणार आहेत. तर या आंदोलनादरम्यान, मनोज जरांगे पाटील हे मस्साजोगमधील आंदोलकांची भेट घेणार आहेत. दरम्यान, सरपंच संतोष देशमुख यांच्या हत्येला दोन महिन्यांहून अधिक काळ उलटला मात्र अद्याप याप्रकरणातील आरोपींना अजूनही शिक्षा झालेली नाही तसेच या हत्याकांडातील आरोपी असलेल्या आकाच्या आकाच्या मुसक्या देखील पोलिसांकडून अवळण्यात आलेल्या नाहीत. तर या प्रकरणातील आरोपी कृष्णा आंधळे हा अद्याप फरार असून मोकाटच असल्याचे दिसतेय. या सर्व पार्श्वभूमीवर मस्साजोगचे ग्रामस्थ चांगलेच आक्रमक झाले आहेत.

काय आहेत गावकऱ्यांच्या 7 प्रमुख मागण्या ?

केजचे तत्कालीन PI प्रशांत महाजन आणि PSI राजेश पाटील यांना बडतर्फ करून सहआरोपी करा.

फरार आरोपी कृष्णा आंधळेला लवकरात लवकर अटक करा.

याप्रकरणात सरकारी वकील म्हणून उज्ज्वल निकम यांची नियुक्ती करा.

संतोष देशमुख हत्याप्रकरणाचा खटला जलदगती न्यायालयात चालवा.

वाशी पोलिस स्टेशनचे पोलीस अधिकारी घुले, दिलीप गित्ते, गोरख आणि दत्ता बिक्कड , हेड कॉन्सेटबल यांचे CDR तपासून त्यांना सहआरोपी करा.

आरोपींना फरार करण्यास मदत करणारे संभाजी वायबसे दांपत्य, बालाजी तांदळे, संजय केदार, सारंग आंधळे यांची चौकशी करून सहआरोपी करा.

घटना घडल्यानंतर संतोष देशमुखांचा मृतदेह केज रुग्णालयात नेण्याऐवजी PSI राजेश पाटलांनी तो कोणाच्या सांगण्यावरून कळंबच्या दिशेने वळवला याची चौकशी करा.