खोक्या भोसलेच्या कुटुंबावर प्राणघातक हल्ला! तेजू भोसलेने सांगितला थरार

बीड जिल्ह्यातील शिरूर कासार येथे सतीश उर्फ खोक्या भोसले यांच्या कुटुंबीयांवर मध्यरात्री प्राणघातक हल्ला झाल्याची घटना समोर आली आहे. दोन गाड्यांमधून आलेल्या १० ते १५ जणांच्या टोळक्याने भोसले यांच्या पत्नी आणि इतर महिला नातेवाईकांना मारहाण केली. हल्लेखोरांच्या हातात कुऱ्हाड, तलवारी, दगड आणि काठ्या होती, असे जखमींनी सांगितले.

या हल्ल्यात पाच ते सहा महिला गंभीर जखमी झाल्या असून, काही जणांना डोक्याला मार लागला आहे. हल्लेखोरांनी जातिवाचक शिवीगाळ करत इथे राहू नका, घर सोडून निघून जा, अशी धमकी दिल्याचे पीडितांनी म्हटले आहे. रामदास बडे, अजिनाथ खरमाटे, संदीप ढाकणे आणि माऊली शिरसाठ यांच्यासह काही जणांना ओळखल्याचे कुटुंबीयांनी सांगितले आहे. मात्र, या प्रकरणी अद्याप पोलिसांत गुन्हा दाखल झालेला नाही, केवळ रुग्णालयात दाखल करण्यात आले आहे. पीडित कुटुंबाकडून तात्काळ गुन्हा दाखल करून न्याय देण्याची मागणी होत आहे.