BJP VS Shiv Sena | अंगावर आलात तर शिंगावर घेऊ; भंडाऱ्यात महायुतीत पुन्हा ठिणगी! शिवसेना-भाजप आमनेसामने

भंडारा जिल्ह्यात शिवसेना आणि भाजप यांच्यातील राजकीय संघर्ष अधिक तीव्र झाला आहे. शिवसेना जिल्हाप्रमुख अनिल गायधने यांनी भाजपसोबत समन्वयाची गरज व्यक्त करतानाच, आपल्या नेत्यांवर आरोप झाल्यास शिवसेनेकडून तीव्र प्रत्युत्तर दिले जाईल, असा इशारा दिला. त्यांनी भाजपमध्ये गेलेल्या एका नेत्याचा उल्लेख करत भविष्यात भाजपला त्याचे परिणाम भोगावे लागतील, असेही म्हटले.

याला प्रत्युत्तर देताना भारतीय जनता युवा मोर्चाच्या जिल्हा युवा प्रमुख पेजल भुरे यांनी वैयक्तिक टीका आणि चारित्र्यहनन टाळण्याचे आवाहन केले. शांत आणि संयमी असलेल्या भाजप कार्यकर्त्यांना आव्हान दिल्यास, ते शांत बसणार नाहीत असे त्यांनी स्पष्ट केले. एका भाजप प्रवक्त्याने गायधने यांच्या धमकावण्याच्या भाषेवर आक्षेप घेतला. त्यांनी महायुतीच्या निधी वाटपामध्ये समन्वयाचा अभाव असल्याची टीका करत, सोशल मीडियावरील टीकेचाही निषेध केला. भाजप नेत्यांवर टीका केल्यास शिंगावर घेऊ असा इशारा भाजपनेही दिला असून, भंडारा जिल्ह्यातील महायुतीतील तणाव यामुळे वाढला आहे.