Abhijit Bichukle : … तर साताऱ्याला ‘सितारा’ करणार, सातारा माझ्या हातात द्या… बिचुकले थेट नगराध्यक्षपदासाठी रिंगणात, म्हणाले…

अभिजीत बिचुकले यांनी सातारा नगराध्यक्षपदासाठी प्रथमच उमेदवारी अर्ज सादर केला आहे. नगरपालिकेने केलेल्या कथित अन्यायाच्या विरोधात आवाज उठवत त्यांनी ही निवडणूक लढवण्याचा निर्णय घेतला आहे. पूर्वी नगरपालिकेत नोकरी करत असताना, सौभाग्यवती अलंकृताजी बिचुकले यांच्या प्रचारात दिसल्यामुळे कामावरून काढल्याचा आरोप त्यांनी केला. साताऱ्यातील खड्डे, रस्त्यांची दुरवस्था आणि बागांची उपेक्षा यावर त्यांनी 25 वर्षांपासून लक्ष ठेवले आहे. सातारकरांनी नगराध्यक्षपद दिल्यास साताऱ्याला खऱ्या अर्थाने ‘सितारा’ करून दाखवण्याचे आश्वासन बिचुकले यांनी दिले आहे.

बिचुकले यांनी अरुण काका गोडबोले यांच्या स्मरणार्थ आदरांजलीचा मुद्दाही उपस्थित केला. तसेच, विश्वरत्न डॉ. बाबासाहेब आंबेडकर ज्या प्रतापसिंह हायस्कूलमध्ये शिकले, त्या राजवाडा येथील जागेत राष्ट्रीय स्मारक उभारण्याची ग्वाही दिली. 7 नोव्हेंबर रोजी शासन विद्यार्थी दिन साजरा करते, त्या अनुषंगाने हे स्मारक उभारण्याचा त्यांचा मानस आहे. आपला आधार आणि मतदान साताऱ्याचेच असल्याने, आपण सच्चे सातारकर असल्याचे त्यांनी म्हटले. साताऱ्याचे नाव रोशन करण्याची संधी मिळावी, अशी विनंती त्यांनी मतदारांना केली आहे.