भाजपच्या कार्यकर्त्यांना त्यांचा अति आत्मविश्वास नडला… ज्येष्ठ नेत्याचं सुचक विधान

भारतीय जनता पक्षाचे ज्येष्ठ नेते आणि राष्ट्रीय स्वयंसेवक संघाचे वरिष्ठ स्वयंसेवक गिरीश व्यास यांनी अलीकडील पदवीधर मतदारसंघातील निवडणुकीतील भाजपच्या पराभवावर महत्त्वपूर्ण भाष्य केले आहे. कार्यकर्त्यांचा अति आत्मविश्वास हे पराभवामागील एक महत्त्वाचे कारण ठरल्याचे त्यांनी नमूद केले. यासोबतच, नोंदणी केलेल्या नावांपैकी अनेक नावे अंतिम मतदार यादीतून गायब झाल्याचा गंभीर मुद्दाही त्यांनी उपस्थित केला. व्यास यांच्या मते, निवडणुकीच्या तयारीमध्ये काही प्रमाणात गलथानपणा आला, ज्यामुळे कार्यकर्त्यांमध्ये अति आत्मविश्वास वाढला.

पक्षाने केलेल्या नोंदणीतील अनेक नावे मतदार यादीत न आल्याने याचा फटका बसला. स्वतः गिरीश व्यास यांनी भरलेल्या फॉर्ममधील नावही मतदार यादीत आले नव्हते, असा अनुभव त्यांनी सांगितला. काँग्रेसचे नेते विजय वडेट्टीवार यांच्या नागपूर हा काँग्रेसचा बालेकिल्ला या विधानालाही त्यांनी प्रत्युत्तर दिले. नितेश कराळे या फॅक्टरमुळे भाजपला निश्चित रूपाने धोका झाला, असेही व्यास यांनी स्पष्ट केले. पक्षाकडून या चुकांचे गंभीरपणे चिंतन केले जाईल आणि भविष्यातील निवडणुकांमध्ये शंभर टक्के यश मिळवले जाईल, असा विश्वास त्यांनी व्यक्त केला.