Manoj Jarange Video | भर मंचावरून मनोज जरांगेंचं व्यंग; अखेर बावनुकळे म्हणाले, ‘माझ्या शरीरावरून, चेहऱ्यावरून…

मनोज जरांगे-पाटील यांनी केलेल्या टीकेवर आणि व्यंगावर भाजप नेते चंद्रशेखर बावनकुळे यांनी तीव्र भावना व्यक्त केल्या आहेत. जरांगेंनी माझ्यावर केलेले व्यंग न पटणारे असल्याची खंत बावनकुळे यांनी व्यक्त केली, यावेळी ते भावूक झालेले दिसले.

आपल्या कुटुंबाचा उल्लेख करत बावनकुळे म्हणाले की, त्यांची पत्नी कुणबी समाजाची आहे, तर सूनबाई मराठा समाजाची आहे. यासोबतच त्यांनी जात पडताळणी प्रक्रियेवरही भाष्य केले. जर जात पडताळणीमध्ये प्रमाणपत्र रद्द झाले, तर आपण काहीही करू शकणार नाही, असे त्यांनी स्पष्ट केले. बावनकुळे म्हणाले की, जर त्यांच्या शरीरावर किंवा चेहऱ्यावर टीका करून जरांगेंना आनंद मिळत असेल किंवा समाजाला यातून न्याय मिळत असेल, तर नक्कीच त्यांनी माझी टिंगल टवाळी करावी. मात्र हे योग्य नाही.

आपण कधीही वाईट वागलो नाही, जातीभेद केला नाही किंवा मराठा-ओबीसी वादातही कधी पडलो नाही, असे त्यांनी अधोरेखित केले. महसूल खात्याने इतके काम करूनही जर आपले व्यंग केले जात असेल, तर यावर काही मार्ग नाही, अशी खंत त्यांनी व्यक्त केली. जाणीवपूर्वक मला लक्ष्य केले जात असल्याचा संशय त्यांनी व्यक्त केला.