Chhatrapati Sambhajinagar : एक WhatsApp स्टेटस अन् मोठा जमाव जमला, संभाजीनगरच्या करमाडमध्ये काय घडलं?

छत्रपती संभाजीनगर जिल्ह्यातील करमाड गावात WhatsApp स्टेटसच्या वादामुळे धार्मिक तणावाची परिस्थिती निर्माण झाली आहे. एका व्यक्तीने आक्षेपार्ह स्टेटस ठेवल्याने गावातील नागरिक मोठ्या संख्येने करमाड पोलीस स्टेशनमध्ये जमा झाले होते. स्टेटस ठेवणाऱ्या व्यक्तीवर गुन्हा दाखल करण्याची मागणी या जमावाने केली. रात्री उशिरा पोलिसांनी संबंधित व्यक्तीवर गुन्हा दाखल केल्यानंतर हा जमाव पांगला. मात्र, आज सकाळी दुसऱ्या बाजूच्या गटानेही पोलीस स्टेशनमध्ये गर्दी केली. त्यांनी त्यांच्या विरोधी गटातील लोकांवर गुन्हा दाखल करण्याची मागणी केली आहे.

सध्या पोलीस स्टेशनमध्ये मोठ्या संख्येने लोक जमलेले असून, पोलीस अद्याप त्यांच्या मागणीनुसार गुन्हा दाखल करू शकलेले नाहीत. यामुळे दोन्ही गट पोलिसांवर दबाव टाकत असून, करमाड गावात तणावपूर्ण स्थिती कायम आहे. ही परिस्थिती हाताळण्यासाठी पोलीस प्रशासन सतर्क आहे.