शेकडो जीव वाचवणाऱ्या कॅप्टन स्मित यांना फडणवीस म्हणाले ‘खरा हिरो’! भरभरून केलं कौतुक

मुख्यमंत्री देवेंद्र फडणवीस यांनी महाराष्ट्र सुपुत्र कॅप्टन स्मित वंचार यांच्या शौर्याचे भरभरून कौतुक केले आहे. शेकडो लोकांचे प्राण वाचवून आपल्या प्राणाची बाजी लावणाऱ्या कॅप्टन स्मित यांना फडणवीसांनी ‘खरे हिरो’ असे संबोधले आहे. फडणवीसांनी आपल्या अधिकृत ट्विटर अकाऊंटवरून कॅप्टन स्मित यांच्या कार्याची प्रशंसा केली आहे. फडणवीस म्हणाले, “मुंबईचा सुपुत्र आणि खरा हिरो कॅप्टन स्मित यांच्याबद्दल मला अभिमान वाटतो.

स्मित यांनी अत्यंत असाधारण आणि विलक्षण पद्धतीने शेकडो लोकांचे प्राण वाचवले.” गंभीर दुखापती असतानाही कॅप्टन स्मित वंचार यांनी दाखवलेली प्रसंगावधानता आणि धैर्य खरोखरच अनुकरणीय असल्याचे फडणवीसांनी नमूद केले. या कठीण प्रसंगात प्रवाशांनीही एका टीमप्रमाणे तत्परतेने काम केले, त्यांचेही कौतुक फडणवीसांनी केले. कॅप्टन स्मित लवकर बरे व्हावे आणि त्यांना उत्तम आरोग्य लाभो, अशी कामना फडणवीसांनी व्यक्त केली. पुढे ते म्हणाले, “आपण युवकांसाठी प्रेरणास्थान आहात, महाराष्ट्र आणि देशाला आपला अभिमान वाटतो.” फडणवीसांच्या या कौतुकामुळे कॅप्टन स्मित यांच्या धाडसाला आणि सेवाभावाला दाद मिळाली आहे.