धाराशिवमधील अवकाळी पावसाने झालेल्या नुकसानीची मुख्यमंत्र्याकडून पाहणी; बळीराजा मदतीच्या प्रतिक्षेत

धाराशिव : मुख्यमंत्री एकनाथ शिंदे आज नुकसानग्रस्त भागाची पाहणी करत आहेत. एकनाथ शिंदे हे धाराशिव दौऱ्यावर आहेत. तुळजापूर तालुक्यातील मोर्डा इथल्या द्राक्ष बागेच्या नुकसानीची मुख्यमंत्र्यांनी पाहणी केली. शेतकरी शिवाजी सुरवसे आणि सीताबाई सुरवसे यांची ही बाग होती. त्याची पाहणी मुख्यमंत्र्यांनी केली आहे. वाडी बामणी इथे गारपीटीमुळे झालेल्या नुकसानीची त्यांनी पाहणी केली. धाराशिव जिल्ह्यातील 71 गावांना अवकाळी पाऊस आणि गारपिटीचा फटका बसला आहे. पहिल्या दिवशी झालेल्या पंचनाम्यात 2 हजार 571 हेक्टर जमिनीवरील पिकांचं नुकसान झाल्याचं समोर आलं आहे. आज तिसऱ्या दिवशीही महसूल आणि कृषी विभागाचे पंचनामे सुरु आहेत. पावसाचा 71 गावांना फटका बसला आहे. तर 38 घरांची पडझड झाली आहे. या सगळ्यात 3 नागरिक जखमी झाले आहेत. सरकारने मदत करावी, अशी मागणी शेतकरी करत आहेत.