Pranjal Khewalkar Drug Case : प्रांजल खेवलकर प्रकरणात मोठा ट्विस्ट, खडसेंच्या जावयाने ड्रग्ज घेतले की नाही? फॉरेन्सिक अहवालातून काय उघड?

पुणे खराडी ड्रग्ज प्रकरणी अटकेत असलेले एकनाथ खडसे यांचे जावई प्रांजल खेवलकर आणि इतर सहा आरोपींनी ड्रग्जचे सेवन केले नसल्याचे फॉरेन्सिक अहवालातून स्पष्ट झाले आहे. पुणे पोलिसांना नुकताच हा अहवाल प्राप्त झाला असून, तो न्यायालयातही सादर करण्यात आला आहे. या प्रकरणामुळे राजकीय वर्तुळात मोठी चर्चा सुरू झाली आहे. एकनाथ खडसे यांचे जावई प्रांजल खेवलकर यांना खराडी येथील ड्रग्ज प्रकरणात अटक करण्यात आली होती.

अटकेनंतर पोलिसांनी त्यांचे आणि इतर आरोपींचे रक्ताचे नमुने फॉरेन्सिक तपासणीसाठी पाठवले होते. या अहवालानुसार, कोणत्याही आरोपीच्या शरीरात ड्रग्जचे अंश आढळले नाहीत. या संदर्भात बोलताना एकनाथ खडसे यांनी या प्रकरणाला रचलेला कट संबोधले. त्यांनी सांगितले की, आरोपींनी ड्रग्ज सेवन केले नव्हते किंवा बाळगलेही नव्हते. त्यांच्यावर गुन्हा दाखल नसतानाही गुन्हे दाखल केल्याचे दाखवण्यात आले होते, आणि नंतर पोलिसांनी प्रिंटिंग मिस्टेक असल्याचे म्हटले. खडसे यांनी या प्रकरणी न्यायालयीन लढाई लढण्याची भूमिका घेतली आहे.