जनतेची माफी मागा; एकनाथ शिंदेंचा राहुल गांधी आणि इंडिया आघाडीवर हल्लाबोल

उपमुख्यमंत्री एकनाथ शिंदे यांनी निवडणूक आयोगाच्या तिन्ही आयुक्तांच्या संयुक्त निवेदनानंतर विरोधी पक्षांवर, विशेषतः इंडिया आघाडीवर तीव्र शब्दांत टीका केली आहे. विरोधकांचे राजकारण केवळ फेक नरेटिव्हवरच टिकू शकते, हे या निवेदनामुळे पुन्हा एकदा सिद्ध झाल्याचे शिंदे यांनी म्हटले आहे. शिंदे यांच्या म्हणण्यानुसार, इंडिया आघाडीचे नेते निवडणूक आयोगात अंतर्गत मतभेद असल्याच्या खोट्या आणि निराधार बातम्या पसरवून आनंदोत्सव साजरा करत होते.

मात्र, तिन्ही निवडणूक आयुक्तांनी दिलेल्या संयुक्त निवेदनामुळे त्यांच्या या दाव्यांमधील हवा पूर्णपणे निघून गेली आहे. याच खोट्या मुद्द्यांचा आधार घेत विरोधी पक्षनेते राहुल गांधी आणि इंडिया आघाडीच्या नेत्यांनी पंतप्रधान नरेंद्र मोदी आणि गृहमंत्री अमित शहा यांच्यावर पातळी सोडून टीका करण्याचा अयशस्वी प्रयत्न केला, असे शिंदे यांनी नमूद केले. अशा पद्धतीने बदनामीचे राजकारण करणाऱ्या राहुल गांधी आणि इंडिया आघाडीच्या नेत्यांनी देशाच्या जनतेकडे माफी मागितली पाहिजे, अशी मागणी उपमुख्यमंत्री एकनाथ शिंदे यांनी आपल्या एक्स पोस्टद्वारे केली आहे.